Британияҕа баар Оссетт куорат олохтооҕо Аррон Уолшоу Lotto Millionaire Raffle диэн лотереяҕа кыттан, 1 мөлүйүөн фунт стерлинг сүүйдэ (83 мөлүйүөн солкуобай). Маҕаһыын сабыллыан икки мүнүүтэ иннинэ эр киһи лотерея билиэтин атыылаһа охсоору кассаҕа сүүрэн кэлбит, онто кини иннигэр уочаракка биир дьахтар турар эбит. Дьахтар эр киһи олус ыксаабыт көрүҥнээҕин көрөн, бэйэтин иннигэр киллэрбит. Аныгыскы күнүгэр Британия олохтооҕо кини билиэтэ кыайыылаах буолбутун билэн, үөрэн охто сыспыт. Аррон уонна кини кэргэн ылаары сылдьар кыыһа үөрүүлэриттэн хосторун иһигэр үҥкүүлүү-үҥкүүлүү, бу харчыны сыбаайбаларыгар, саҥа дьиэлэригэр уонна массыына ыларга туттуохпут диэн үөрбүттэр-көппүттэр.
Таиланд хаспаҕар
“Лесные Вепри” Тайланд юниорскай хамаандатын 12 оонньооччута уонна кинилэр тириэньэрдэрэ Тхам Луанг диэн хаспахха халаан уута кэлбитигэр хаайтаралларыгар, биир да саппаас аһылыга суох эбиттэр. “Хаспахха киирэрбитигэр аһылыкпыт суох этэ. Биһиги онно бырааһынньыктыыр былааммыт отой суох этэ, төрөөбүт күннээх табаарыспыт дьиэтигэр ыксаан баран испиппит, кини төрөппүттэрэ биһиэхэ анаан бырааһынньык остуолун бэлэмнээбиттэр этэ”, – диэн этэр хамаанда чилиэнэ.
Нью-Йорк акулалара
Нью-Йорк штат салалтата акулалар икки оҕоҕо саба түспүттэрин иһин, Файр арыыга баар икки пляһы быстах кэмҥэ сапта. ABC канал биллэрэринэн, 13 саастаах уол оҕоҕо уонна 12 саастаах кыыс оҕоҕо сөтүөлүү сырыттахтарына, акулалар саба түспүттэр. Экспертэр оҕолор эчэйиилэрин көрөн баран, акула тииһин суола диэн быһаарбыттар. Оҕолор эмтэнэн, үтүөрэн балыыһаттан тахсыбыттар үһү.
Дьоппуоннар ньиэптэн аккаастанан эрэллэр
Дьоппуон хампаанньалара Ирантан кэлэр ньиэптэн аккаастанарга бэлэмнэнэн эрэллэр. Бу сыл алтынньытыттан Күн тахсар дойдута хара көмүс атын источниктарын көрдүөхтэрэ. Токио Саудовскай Аравияны уонна атын араб дойдуларын кытары кэпсэтиилэри ыыта турар диэн омук дойдутун СМИ-лэрэ биллэрэллэр.
Google 4,34 млрд дуолларга ыстарааптанна
Евро-хамыыһыйа “Google” хампаанньаны, сокуоннайа суохтук Android тэриллэри оҥорор хампаанньалары уонна мобильнай оператордары хааччахтааһыҥҥа буруйдуур. Еврохамыыһыйа быһаарыытынан, “Google” хампаанньа Евросойуус антимонопольнай сокуонун кэспитин иһин, 4,34 млрд дуолларга ыстарааптанар. Онуоха хампаанньа сүрүн дириэктэрэ Сундара Пичаи биллэрэринэн, “Google” Евро-хамыыһыйа быһаарыытын кытта сөбүлэспэт уонна ыстараабы ааһынар санаалаах.
Казахстаҥҥа олимпиада призерун өлөрдүлэр
От ыйын 19 күнүгэр күнүс 15:00 чааска Казахстан Алма-Ата куоратыгар Казахстан саамай биллэр фигуриһа, 2014 сыллаахха буолбут Олимпийскай оонньуулар боруонса мэтээллэрин хаһаайына Денис Тен быһахтан бааһырбыта. Сабаҕалаан көрдөрүүлэринэн, спортсмен массыынатын халыы турбут уоруйахтартан эчэйбит. Куһаҕан санаалаах дьон кинини өттүккэ быһаҕынан анньыбыттар, спортсмен элбэх хаанын сүтэрэн, эпэрээссийэ кэмигэр өлбүт. Денис Тен 25 эрэ саастаах этэ.
Хорватия футболиһа биир дойдулаахтарын кирэдьииттэрин сапта
Хорватия сүүмэрдэммит хамаандатын футболиһа Анте Ребич мундиалга ситиһиитигэр ылбыт харчытынан төрөөбүт дэриэбинэтин бары олохтооҕун (500-чэ киһи) кирэдьиитин төлөөтө. Анте Ребич Сплит куорат таһыгар баар кыракый Имоцки диэн сиргэ төрөөбүтэ. Анте 19 сааһыттан “Фиорентина” диэн ааттаах Италия хамаандатыгар оонньуур, ол да буоллар, төрөөбүт, улааппыт дойдутун туһунан умнубат. Ребич Арассыыйаҕа буолбут футболга аан дойду чөмпүйэнээтигэр 6 матчка кыттыыны ылбыта уонна биир голлаах, Аргентина хамаандатын боруотатыгар киллэрбитэ.
Афанасий НОЕВ, «Саха сирэ» хаһыат, edersaas.ru