Сайтпытыгар бу дьыл олунньу 4 күнүгэр «Кытайдар саха бриллианын ыйыстыбыттар» диэн матырыйаалым бэчээттэммитэ.
Вера МАКАРОВА, «Саха сирэ» хаһыат, edersaas.ru
Онно Санкт-Петербург куоракка олунньу ый саҥатыгар ыытыллыбыт ювелирдар норуоттар икки ардыларынааҕы ХХV «Экспофорумнарыгар» сенсационнай уоруу тахсыбытын туһунан суруйбутум.
Санатар буоллахха, олунньу 1 күнүгэр Санкт-Петербург куоракка турист быһыытынан кэлбит Кытай гражданнара — дьахтардаах эр киһи — бу форумҥа «Бриллианты Якутии» стендэтиттэн 3.01 карат ыйааһыннаах «D/VS1» бриллианы уоран баран, ол оннугар көннөрү тааһы уурбуттар этэ. Бриллиант сыаната 6 мөл. 300 тыһ. солк.!
Онуоха бриллианы атын тааска уларыппыттара түргэнник биллэн, видеокамера көмөтүнэн, полицейскайдар уорбаланааччылары сол күн туппуттара — 30 саастаах китаянканы «Экспофорумтан» чугас сиртэн, онтон 38 саастаах эр киһини хас да чаас буолан баран, Пулково аэропортан, Пекиҥҥэ көтөөрү сырыттаҕына. Форумтан тахсаат, суолларын бутуйан буолуо, икки аҥы барбыттарын.
Бу чахчынан РФ Холуобунай кодексатын 158-с ыст. 4-с чааһынан дьыала тэриллибитэ.
Оттон ыарахан сыаналаах күндү тааһы онно булбатахтара. Оперативниктар уорбаланааччылар малларын чүүччэйбиттэрэ да, булбатахтара.
Бастакы сабаҕалааһын быһыытынан, эр киһи өссө стендэ аттыгар туран бриллианы ыйыстыбыт диэн буолбута. Ол иһин эр киһини хонбуойдааннар, чугастааҕы балыыһаҕа илдьибиттэрэ. Ренгент уонна УЗИ пациент куртаҕар туора эттик баарын чуолкайдык көрдөрбөт буолан, полицейскайдар уонна медиктэр бриллиант «естесcтвеннэй» суолунан тахсарын күүппүттэрэ да мэлийбиттэрэ — бриллиант суоҕа.
Тутуллубут уорбаланааччы дьахтары Силиэстийэлиир изоляторга хаайбыттара.
Оттон бэҕэһээ, муус устар 28 күнүгэр, Санкт-Петербург куорат Пушкинскай оройуоннааҕы суута Кытай гражданката Лю Лимэйгэ бириигэбэр таһаарда. Бу туһунан НТВ телеханаал иһитиннэрдэ.
Сууттанааччы Лю Лимэй оҕо саадыгар иитээччинэн үлэлии сылдьыбыт.
Суут мунньаҕын кэмигэр уорбутун иһин бырастыы гыналларыгар ытыы-ытыы, тобуктаан туран көрдөспүт. «Дойдубар, дьиэ кэргэммэр, оҕолорбор ыытыҥ, төрөппүттэрим кырдьаҕас, бэйэлэрин кыаммат дьон» диэн ааттаспыт.
Буруйун билиммит уонна аҕата кыыһа оҥорбут хоромньутун сууматын төлөөрү, дьиэлэрин атыылаабытын туһунан иһитиннэрбит.
Ол эрэн, күндү тааһы билигин да була иликтэр. Бриллианы өссө үһүс куомуннаах (иккис дьахтар) Кытайга илдьэ барбыт диэн сабаҕалыыллар.
Бу буруйу оҥоруу эрдэттэн былааннаммыт — бэлэмнэнэн, сыал-сорук оҥостон, анаан-минээн сакааһынан кэлэн уорбуттар.
Бу холуобунай дьыала сууттанааччы Лю Лимэй хадатаайыстыбатынан, ураты бэрээдэгинэн көрүллүбүт.
Уоруллубут бриллиант хаһаайына — ювелирнай фирма — дьахтары аһынан, ыстарааптаан баран, дьиэтигэр ыыталларыгар көрдөспүт.
Ол эрэн бу 158-с ыстатыйа 4-с чааһа ыарахан буруйга киирэр — ураты бөдөҥ кээмэйдээх уорууга.
Онон, суут уоруйах китаянканы 3 сылга уопсай режимнээх холуонньаҕа көҥүлүн быһарга уурбут.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.