Кэлиҥҥи сууккаҕа өрөспүүбүлүкэҕэ 68 киһи хамсык дьаҥар сыстыбыт. Ити туһунан СӨ бырабыыталыстыбатын бэрэссэдээтэлин солбуйааччы, суһал штаб салайааччыта Ольга Балабкина брифинг кэмигэр иһитиннэрдэ.
edersaas.ru
Ол курдук, Дьокуускай куоракка – 35, Миринэйгэ – 10, Аммаҕа – 6, Мэҥэ Хаҥаласка – 5, Үөһээ Бүлүүгэ – 4, Намҥа – 3, Алдаҥҥа – 2, Горнайга, Тааттаҕа, Хаҥаласка биирдии киһи ыалдьыбыта бэлиэтэммит. Биир киһи суох буолбут.
“Хантаахтаахтаспыт дьону, чопчу ыалдьыбыт киһи бэйэтэ ыйыытынан СӨ Роспотребнадзора быһаарар. Онон Роспотребнадзор, Доруобуйа харыстабылын тэрилтэлэрэ чопчу кинилэри кытта үлэлэһэллэр.
Суукка устата лабораториялар 4000 анаалыһы оҥороллор. Суукканы эргиччи үлэлиир эрэсиимҥэ көстүлэр. Бу, ОРВИнан уонна гириибинэн үрдүк бэлэмнээх буолууга көһүүнү кытта сибээстээх”, — диэн эттэ.
Балаҕан ыйын 13 күнүгэр өссө биир 60 койкалаах инфекционнай стационары аспыттар. Онон Дьокуускай куоракка 1629 койканы бэлэмнээбиттэр. Сотору кэминэн 180 миэстэлээх өссө икки стационар арыллара былааннанар эбит.
Доруобуйа харыстабылын министиэристибэтигэр быһа сибээс лиинийэтэ үлэлиир. Бэйэҕит поликлиникаҕытыгар, суһал көмөҕө төлөпүөннээн тиийбэтэххитинэ суукканы эргиччи үлэлиир төлөпүөҥҥэ эрийиҥ диэн иһитиннэрдэ.
Ону тэҥэ, саҥа быраабыланан, өскөтүн, үөрэх тэрилтэтигэр (оскуолаҕа, уһуйааҥҥа…) оҕо дуу, учуутал дуу хамсыкка хаптарбыттара билиннэҕинэ, ыалдьыбыт киһи үөрэммит, үлэлээбит кылааһа эбэтэр бөлөҕө эрэ тохтотулларын, оскуолаҕа үөрэх хаамыыта салҕанарын санатта.
Дойду бырабыыталыстыбатын уурааҕар олоҕуран, РФ бэрэсидьиэнин ыйааҕынан медиктэр эбии төлөбүрү ылалларын, маныаха хойутааһын суоҕун эттэ. СӨ бырабыыталыстыбатын уурааҕынан көрүллэр эбии төлөбүр, үлэ толоруллубутун кэннэ (фактически) төлөнөр диэн эттэ. Онон төлөбүр поликлиникалар, балыыһалар, обсерватордар үлэлэрин туттардахтарына эрэ төлөнөрүн ыйда.
Людмила ПОПОВА, “Саха сирэ” хаһыат, edersaas.ru