Дьокуускайга Чернышевскай уулусса 66 №-гэр баар баазаҕа бүгүн киһи, массыына толору. Атыы-кутуу күүскэ барар. Дьэ, сыанабыт хайдаҕый? Атыыһыттар этэллэринэн, сыана кыралаан үрдээн эрэр.
Арай “Мирель” туорду атыылыыр маҕаһыын сыанатын тутан турар, онон ол маҕаһыыҥҥа киһи элбэх. Бааза үрдүнэн саамай чэпчэки сыаналаах 1 №-дээх ыскылаат-маҕаһыыҥҥа туалет кумааҕыта 22 солк. буолбут (урут – 19 солк.). Атын бородуукталарга сыана син кыратык эбиллибит курдук.
28 №-дээх ыскылаакка бородуукта сыаната ама диэн дьон үксэ итинтэн атыылаһар. Хата, фруктаны атыылаһааччы аччаабыт курдук. Хортуоппуй киилэтэ – 75 солк. Уопсайынан ыллахха, фруктаҕа, оҕуруот аһыгар сыана оннунан турар. Көрдөхпүнэ, дьон үксэ куурусса буутун атыылаһар. Дьааһыгынан атыылаһаллар, Бразилия киэнэ сымнаҕас диэн хайгыыллар. Бразилия киэнэ сыаната ортотунан — 200 солк. Бурятияҕа оҥоһуллут эт кэнсиэрбэтэ 150-165 солк. Мас арыытын сорохтор сүүрбэччэлии бытыылканы ылаллар. “Злато”, «Золотая семечка” – 144-147 солк. Сорох маҕаһыыннар мокоруон оҥоһуктары дьааһыгынан эрэ биэрэллэр. “Алейка “ вермишелин 35 солк. бүтэһик хааны биэрдибит дии турар атыылааччы. Дьокуускайдааҕы көтөрү иитэр фабрика сымыытын сыаната үрдүү илик, ол да буоллар, бырааһынньык чугаһаан, атыыга хамаҕатык барар.
Хаһаайыстыбаннай маҕаһыын-ыскылаакка сыана үрдээбитэ соччо биллибэт, атыыһыттар бастаан улахан хаалаах таҥас сууйар бороһуок кыратык үрдүөҕэ дэһэллэр. Сааскыга хаһаанан элбэҕи атыылаһыам диир киһи бастаан маҕаһыыннары үчүгэйдик көрөн, сыананы үөрэтэрэ ордук буолсу.
Бэлэмнээтэ Женни Стрюкова
Хаартыска: ааптар