Олунньу 24 күнүгэр Мииринэй оройуонун Таас Үрэх сэлиэнньэтин биэнсийэлээхтэрин «Ботуобуйа долгуннара» ансаамбыла «Новай» сопхуос киинигэр Арыылаах бөһүөлэгэр гастроллаан кэллэ.
Бу Игнат Степанович Саввинов салайааччылаах ансаамбыл чилиэннэрэ, кэнсиэри таһынан, “төгүрүк остуол” тула олорон ирэ-хоро кэпсэтэн, ааспыт кэми санаһан, байаанынан үҥкүүлээн, ыллаан-туойан, олус үчүгэйдик сынньанан, элбэх саҥаны-сонуну көрөн-истэн, дойдуларыгар бэркэ сэргэхсийэн эргилиннилэр.
Айаннарыгар спонсордаабыт баһылыктарыгар Зоя Христофоровна Даниловаҕа, массыына биэрэн көмөлөспүт “Роснефтегаз” тэрилтэҕэ «Ботуобуйа долгуннара» ансаамбыл махтала улахан.
Көрөөччүлэр олус истиҥник көрүстүлэр, хас биирдии нүөмэр ситиһиилэннэ. Ол курдук, Кытай чэбдигирдэр гимнастикатын (салайааччы Розалия Евсеева), Маргарита Мордосова, Василий Иванов, Фаина Герасимова, Семен Иванов, Розалия Евсеева ырыаларын, эр дьон квартетын, сценкалары, Максим Попов уонна Наталья Антонова дуэттарын, үҥкүүлэри дохсун ытыс тыаһынан доҕуһуоллаатылар.
Ону сэргэ Арыылаахха Валерий Семенович Потапов аатынан спартакиада буолан ааста. Бу спартакиадаҕа Таас-Үрэх оҕолоро 1 миэстэни ылан, кыайан-хотон кэллилэр. Салайааччы — физкультура учуутала Алексей Владимирович Николаев.
Кэлэр да өттүгэр, араас күрэхтэһиилэр, көрүүлэр, куонкурустар дэлэй буолуохтара.
Ити курдук, ыраах сытар Мииринэй оройуонун биир нэһилиэгэр үлэ, сынньалаҥ көхтөөхтүк барар.
Валентина ВАСИЛЬЕВА, “Эйгэ” өрөспүүбүлүкэтээҕи уопсастыбаннай тэрилтэ салайааччыта.