Саха спордун сүгүрүйээччилэрэ сылы супту күүппүт “Дыгын оонньуулара” түмүктэннилэр. Быйыл эдэр, бэйэлэрин улахан түһүлгэҕэ биллэрэ илик уолаттар кыттар буоланнар, дьон-сэргэ кинилэри билээри, күрэхтэһиини өссө күүстээхтик умсугуйан көрдө. Кыайыылаах уларыйбатаҕын да иһин, былырыыҥҥы “Дыгын оонньууларыттан” биллэ атын хаамыылаах күрэхтэһии буолла.
Эргийэр Ботуев
Үс төгүл үскэ көтөр атаҕынан аатырбыт Хаҥалас хотойун-Егор Филипповы утарсааччылара эккирэтэ да соруммат буолуохтаахтар. Барыларынааҕар 4-5 миэтэрэ иннигэр түһэ сылдьар киһини кыайар ыарахана өйдөнөр. Кини кэнниттэн буолбут Николай Матаннанов иккис миэстэтэ кыайыыга тэҥнэнэр. Оттон бастакытын “Дыгын оонньууларыгар” кытта сылдьар Үөһээ Бүлүү боотура Айсен Ботуев Туймаада туонатыгар ыстанар дьоҕурдааҕын көрдөрөн, үһүс миэстэҕэ тигистэ. Маны таһынан, Айсен тутум эргииргэ икки мүнүүтэҕэ 66 эргиири оҥорон, бу саас 64-тэ эргийэн олохтообут өрөспүүбүлүкэ рекордун тупсарда уонна аатын Туймаада хочотугар дорҕоонноохтук ааттатта. Былырыҥҥы “Дыгын оонньууларын” 2014 сыллааҕы кыайыылааҕа Петр Старостин төһө да атаҕар эчэйиилээҕин иһин, 62-тэ эргийэн иккис миэстэҕэ тигистэ. “Дыгын оонньууларыгар” бастакытын кыттар Амма мадьыныта Борис Сдвижков 61-дэ эргийэн үһүс миэстэҕэ тиксэн, бастакытын “Дыгын оонньууларын” мэтээлин моонньугар кэттэ.
Федоров — мас, хапсаҕай
Былыр-былыргыттан саха норуота мас тардыһыытын уонна хапсаҕайдаһан киирсиини сэргээн көрөр. Саха сирин кыахтаах боотурдара тыҥааһыннаах киирсиилэрин көрөр кэрэхсэбиллээх бөҕө буоллаҕа.
Мас тардыһыытыгар Ньурба боотура Владимир Федоров Дмитрий Попов уонна Эрчим Баппаҕай курдук күүстээх мадьынылары кытта эрчиллэн сайдыбыта киһи хараҕар быраҕылынна. Урукку сылларга кини мас тардыһыытыгар чаҕылыйбат буоллаҕына, быйыл утарсааччылары барыларын кыайан бастаата. Оттон Владимир хапсаҕайдаһан киирсиигэ уруккуттан да үчүгэй этэ. Араас хапсаҕай күрэхтэһиилэригэр ситиһиилээхтик кыттааччы. Ол курдук, “Дыгын оонньууларын” боотурдарын охтортоон, инники күөҥҥэ таҕыста.
Бэргэн Тойтонов
Хас да сыл “Дыгын оонньууларын” киирсиилэригэр хатарыллыбыт Антон Тойтоновтааҕар бэргэн боотур суох эбит. Оҕунан ытыыга Антон 40 очукуону ытан, бастакы үктэлгэ таҕыста. Урут бу көрүҥҥэ өрөгөйдүү сылдьыбыт Егор Филиппов 24 очукуону ытан, иккис миэстэ буолла. Амматтан төрүттээх Борис Сдвижков 22 очукуону ытан үһүстээбитэ. Бэлиэтээн эттэххэ, ох саанан ытыыга киһи ис туругун хайдах сааһыланарыттан элбэх тутулуктаах. Бүтүн өрөспүүбүлүкэ дьоно барыта эн ытаргын көрөн турдаҕына, киһи долгуйан да сыыһыан сөп.
Мөккүөрдээх 400 миэтэрэ
Былырыыҥҥы “Дыгын оонньууларыгар” 400 миэтэрэҕэ сүүрүүгэ Иннокентий Миронов хойутаан, сүүрбэккэ хаалан мөккүспүт буоллахтарына, бу сырыыга күрэхтэһии лидерэ Егор Филиппов бастаан иһэн “Саха” НКИХ быһа биэриини ыытар тэрилин боруобатын фиништиир биэтэк дии санаан тохтоон хаалбытыгар, кэнниттэн испит Николай Матаннанов ситэ баттаан инники күөҥҥэ таҕыста. Егор Филиппов иккис буолла.
Таас көтөҕүүтүгэр Варданян бастакы
Күрэхтэһиини түмүктүүр түһүмэххэ таас көтөҕүүтүгэр үһүс миэстэ иһин киирсэ сылдьар Артем Варданян тааһы 150 миэтэрэ илдьэн бу көрүҥҥэ бастаабыта. Кини кэнниттэн тааһы 137 миэтэрэ илдьибит Егор Филиппов иккис. Оттон Николай Матаннанов 131 миэтэрэ 40 сантымыатыр көрдөрүүлээх үһүс буолла.
Петр Старостин эчэйиилээх кытынна
Нэдиэлэ анараа өттүгэр Чурапчыга ыытыллыбыт “Тоҕус Томтор” многоборьеҕа күрэхтэһиигэ Петр Старостин атаҕын эчэтэн, “Дыгын оонньууларыгар” кыттара салгыҥҥа ыйаммыта. Ол эрэн, кини эр санаатын түмэн, саҕалаабыт дьыалатын ситэрэргэ санаммыта. Киирсэ сылдьан, аны, ойоҕоһун өлөрөн балаһыанньата өссө уустугурбута. Үгүс дьон ити эчэйии кэнниттэн күрэхтэһииттэн туораан хаалыа этэ. Оттон Петр атаҕар эчэйиилээх, тостубут ойоҕостоох, 116 киилэлээх сымара тааһы 12 миэтэрэ илдьибитэ кини кытаанах санаалааҕын туоһулаата.
Егор Филиппов Макаровтыын тэҥнэстэ
Уопсай түмүккэ 18 очукуолаах Егор Филиппов бастакы миэстэни ылан, “Дыгын оонньууларын” үс төгүллээх кыайыылааҕа буолла, уонна “Ниссан Террано” массыынанан наҕараадаланна. Егор Филиппов “Дыгын оонньууларыгар” кыайыытынан Иннокентий Макаровтыын тэҥнэспитин бэлиэтиир тустаахпын. Киниттэн 8 очукуонан хаалан Николай Матаннанов иккис миэстэҕэ тигистэ. Кинини сабыс-саҥа квадроциклынан наҕараадалаатылар. Бастакытын кыттыбыт Айсен Ботуев 36 очукуолаах үһүс миэстэҕэ тиксэн, көрөөччүлэр биһирэбиллэрин ылла уонна матасыыкыл хаһаайына буолла. Айсены саха многоборьетын кэскилэ диэн элбэх киһи сабаҕалыыр.
«Дыгын» лотереятын “Ниссана”
Күрэхтэһии кэмигэр, “Дыгын оонньууларын” кыттыылаахтарын туһунан лотереялаах буклет атыыламмыта. Сүрүн бирииһи, “Ниссан Альмера” массыынаны Нам улууһуттан сылдьар Яков Оконешников сүүйдэ.
Иннокентий Макаров:
— Ыччат сайдан иһэрэ олус үөрдэр. Уопсай бэлэмнэрин көрдөххө, Егор Филиппов таһыччы кыахтаах.
Николай Дьяконов:
— Олус үчүгэй күрэхтэһии буолла. Түгэнинэн туһанан, Сахам сирин олохтоохторугар ситиһиини, табыллыыны, доруобуйаны баҕарабын!
Иван Белолюбскай:
— Мин дьарыктыыр «Боотур» спорт-кулуубум уолаттара Егор Филиппов, Николай Матаннанов, Айсен Семенов уонна Павел Друзьянов төһө кыахтара баарынан кытыннылар. Былырыын эрдэттэн сыал-сорук туруорунан кыттыбытым. Билигин баҕа суох, барыта туолан, таһынан баран турар. Уолаттарбытыгар ситиһиини баҕарыаҕыҥ.
Николай Попов, «Саха сирэ» хаһыат, edersaas.ru