Пандемиянан сибээстээн, оҕолорго эрэгийиэннээҕи төлөбүрдэри сайабылыанньата суох биэрии салҕанар диэн Үлэ, социальнай сайдыы министиэристибэтэ иһитиннэрэр.
Ол курдук, үһүс уонна онтон кэлэр оҕо төрөөтөҕүнэ (иитэ ыллахха) уонна оҕо ыйдааҕы босуобуйатын ыларга сайабылыанньа суруйуллубат, өскөтүн бу босуобуйалары биэрии болдьоҕо 2020 сыл алтынньы 1 күнүттэн 2021 сыл муус устар 1 күнүгэр диэри бүтэр буоллаҕына.
Бу көмөнү ылар быраабы ханнык эрэ биричиинэнэн уһаппакка хаалбыт дьон 2020 сыл алтынньы 1 күнүттэн хос ааҕыыны (перерасчет) ылыахтарын сөп.
Ону тэҥэ, федеральнай уонна эрэгийиэннээҕи регистрдарга баар дьон хомунаалынай өҥөнү төлүүллэригэр көрүллэр социальнай көмө миэрэтэ эмиэ 2021 сыл тохсунньу 1 күнүгэр диэри уһатылынна.
Бу пандемия кэмигэр дьон маассабай мустууларга, тэрилтэлэргэ сылдьыбаттарын ситиһэр туһуттан, маннык быһаарыы ылыллар.
Ангелина Васильева, “Саха сирэ” хаһыат, edersaas.ru