РФ Үлэҕэ, социальнай сайдыыга министиэристибэтэ оҕо 3-тэн 7 сааһыгар диэри босуобуйа төлөнөрүн туһунан сокуон ылынылларыгар докумуоннары бэлэмнээн киллэрдэ.
Владимир Путин тохсунньу 15 күнүнээҕи Анал этиитигэр аан бастаан бу босуобуйа бэриллэрин туһунан эппитэ. Салгыы Госдуумаҕа көрүллэн, Федерация Сэбиэтигэр бигэргэтилиннэҕинэ, бу сайыҥҥыттан сокуон үлэлээн барыахтаах.
Босуобуйа 2020 сыл тохсунньу 1 күнүттэн бэриллэр, ол эбэтэр хос ааҕыы (перерасчет) оҥоһуллар. Кээмэйэ – тиийинэн олоруу алын кээмэйин аҥаарын саҕа. Арассыыйаҕа бу суума 5,5 тыһыынчаҕа тэҥнэһэр, Саха сиригэр – 8,5 тыһыынча солкуобай.
Үлэ министиэристибэтэ бэлэмнээбит докумуона “Гражданнары социальнай өйөөһүн” судаарыстыбаннай бырагыраамаҕа уларытыылары киллэрэр. Ону тэҥэ, эрэгийиэннэргэ бу үбү хайдах тыырары быһаарар быраабылалар киирдилэр.
Оҕо 3-7 сааһыгар ылар босуобуйатын билигин үгүс дьиэ кэргэттэр күүтэллэр. Чахчы, элбэх оҕолоох ыал бүддьүөтүгэр дьоһун көмө буолсу. Ол эрээри, бу босуобуйаны кыаммат (ыйдааҕы дохуоттара дьиэ кэргэн хас биирдии чилиэнигэр тиксэринэн, тиийинэн олоруу алын кээмэйиттэн намыһах буоллаҕына) дьиэ кэргэттэр эрэ ылар кыахтаахтар.
Онон, орто хамнастаах, элбэх оҕолоох ыаллар бу босуобуйаны ылыахтарын сөп.
Ангелина Васильева, “Саха сирэ” хаһыат, edersaas.ru
Хаартыска — Интэриниэттэн.