Ахсынньы саҥатыгар бассаапка “Элбэх оҕолоохторго, аҥардас төрөппүттэргэ, кыаммат дьоҥҥо көмөлөһөбүт” диэн биллэриигэ хараҕым хатаммыта. Онно “Хозмастер” диэн тэрилтэ үлэһиттэрэ биир күн кэлэн өрөмүөҥҥэ, хаһаайыстыба араас үлэтигэр босхо үлэлээн биэрэбит диэбиттэр этэ.
Биир ый буолан баран, туох үлэни ыыппыттарын интэриэһиргээн, эрийэ сырыттым.
“Хозмастер” хампаанньаны 2016 сыллаахха предприниматель Александр Каверзин төрүттээбитэ. Кини газоэлектросварщик, бульдозер машиниһа идэлээх, урут араас тэрилтэлэргэ үлэлээбитэ. Бэйэтэ дьиэ туттан баран, тутуу эйгэтигэр дьон араас өҥөҕө наадыйарын өйдөөбүтэ. Балкону маһынан, өстүөкүлэнэн бүрүйүү, электрическэй розетканы, алдьаммыт кырааны, ааны уларытыы, түннүккэ кумаары киллэрбэт сиэккэни туруоруу, ваннай хоһу кафелынан бүрүйүү, онтон да атын ииспэрэй үлэ ханна барыай? Киһи эрэ барыта илии үлэтин сатаабат эбээт.
Нууччаларга “мастер на все руки” диэн этии баар. Александр оннук курдук араас өҥөлөрү оҥортуура, онтон кэҥэттэр санааттан, маастардары ыҥырбыта. Бу курдук ситиһиилээхтик үлэлии сылдьан, бу сайыҥҥыттан дьоҥҥо көмөлөһөр санаа киирбитэ. Бассаапка биллэрии таһаарбытыгар 50-ча ыал көмө көрдөөн эрийбиттэрэ.
“Биһиги буолбатаҕына, ким?”
Ахсынньыттан 6 ыалга көмөлөстүлэр. Хас сэрэдэ ахсын, маастардар тиийэн, босхо үлэлээн биэрэллэр. Сорох ыаллар өрөмүөннэтиэхтэрин баҕараллар эрээри, матырыйаалларын ыла илик буолан, бытаарыы тахсар. Ону тэҥэ дьонтон ордук тутуу матырыйаалларын ылан баран, бу аһымал бырайыактарыгар туһаналлар. Холобур, дьон өрөмүөн кэнниттэн ордон хаалбыт матырыйаалларын биэрэллэр. Үтүө үтүөҕэ тардыһар диэн, кырдьык. Оннооҕор, бу ыстатыйа үтүө санааттан сурулуннаҕа…
Ону тэҥэ “хозмастердар” аһымал аахсыйаларын кэҥэтэн, Саҥа дьыл иннинэ 8 дьиэ кэргэҥҥэ бэс мастары – тыыннаах дьуолкалары бэлэхтээбиттэрэ.
—Киин куоракка Үтүө санаа сыла биллэриллибитигэр, “мин тугунан дьоҥҥо көмөлөһүөхпүн сөбүй?” диэн толкуйдаабытым. Бу бырагыраамабыт “Биһиги буолбатаҕына, ким?” диэн ааттаах. Бэйэҥ кыаҕыҥ иһинэн дьоҥҥо көмөлөһөр кыахтаах буоллаххына, саараабакка оҥоруохтааххын дии саныыбын. Бырагыраамабыт салҕанан барыа. Уочаракка суруйтарбыт дьоммутугар барыларыгар көмөлөһүөхпүт.
Араас өҥөнү оҥорор хампаанньалар элбэхтэр, ол эрээри хаачыстыбаҕа үлэлиир эрэллээх тэрилтэлэр аҕыйахтар. Куһаҕаннык оҥорон баран, сүтэн хаалаллар. Биһиги хаачыстыбаҕа тардыһабыт, ханнык баҕарар дьыаланы тиһэҕэр тиэрдэргэ кыһаллабыт. Ол иһин килийиэннэрбит оҥорторон баран, иккиһин-үсүһүн сакаастыыллар, — диэн Александр кэпсиир.
Александр Каверзин предпринимателлэр биэчэрдэригэр. 2017 с.
Бу үтүө холобуру атын предпринимателлэр эмиэ батыһаллара буоллар диэн санаа баар…
Ангелина Васильева, “Саха сирэ” хаһыат, edersaas.ru