Кулун тутар бүтүүтэ “Арыгыта суох сыбаайба сүпсүлгэнэ” диэн ураты күрэс буолан ааста. Бу күрэһи Арыгы атыытын сүрүннүүр управление уонна ЗАГС, «Трезвая Якутия» хамсааһын тэрийэн ыыттылар.
Куонкурус икки ыйы быһа барбыта, үс түһүмэхтээх этэ. Аан бастаан пааралар сайаапкаларын, анкеталарын ыыппыттара. Сүрүн ирдэбил – пааралара сыбаайбалыы илик уонна урууларын арыгыта суох ыытар баҕалаах буолуохтаахтар. Салгыы чөл олох туһунан видеоролик оҥорон интэриниэккэ укпуттара. Кинилэртэн 5 паараны талан ылан, финалга ыҥырбыттара. Үһүс түһүмэххэ куоластааһын буолбута уонна пааралар дьүүллүүр сүбэни кытары кэпсэтиини ааспыттара.
“Саамай креативнай паара” аатын Марина Селецкая уонна Андрей Лизнёв ыллылар.
«Саамай идиэйэлээх паара» — Надежда Тихонова уонна Александр Уаров.
«Көрөөччүлэр биһирэбиллэрэ» Сайыына Аржаковаҕа уонна Айаал Брызгаловка тигистэ. Кинилэр саамай элбэх куолаһы ылбыттар.
“Чөл олох, таптал, бэриниилээх буолуу холобура” ааты Людмила Григорьева уонна Владимир Сластион ыллылар. Кинилэр 2011 сыллаахха Чөл олох аан дойдутааҕы академиятын форумугар билсибиттэр. Ол кэмҥэ кинилэр 73-75 саастаахтар эбит. Иккиэн чөл олох пропагандистара, спордунан дьарыктаналлар. Владимир Яковлевич 50-на холкутук тардыныан, 50-на сиртэн анньыныан сөп, күҥҥэ иккитэ тымныы уунан куттар.
Онтон кыайыылаахтарынан Туйаара Игнатьева уонна Дьулустан Сысолятин буоллулар. Кинилэр Мэҥэ Хаҥалас Суолатыттан сылдьаллар. Сүрүн спонсор — «Ренабо» гостиница комплексын бирииһин ыллылар. Онно 50 киһилээх сыбаайбаны ыытарга сертификат туттардылар. «Yes» агентство урууну иилээн-саҕалаан тэрийиэҕэ.
Сайыына Ураллааҕы юридическай университет устудьуоҥката, Айаал Екатеринбург куоракка үлэлиир. 2014 сыллаахха билсибиттэр, доҕордоһуулара сыыйа улахан тапталга кубулуйбут. Икки кыыс оҕолоохтор. Сыбаайбалыы иликтэр эбит. Иккиэн чөл олоҕу тутуһаллар. Сайыына волейболунан дьарыктанар, Айаал хайыһардыыр.
Ангелина ВАСИЛЬЕВА, “Саха сирэ” хаһыат, edersaas.ru