«Саха сирэ» хаһыат бу сылга бастакы нүөмэрэ бүгүн, тохсунньу 11 күнүгэр, өрөспүүбүлүкэ ааҕааччыларыгар босхо тиийиэҕэ. Барыта холбоон 37 000 кэриҥэ хаһыат тарҕаныаҕа.
Манна ырыаhыт Геннадий Семенов — Урааҥхай киэҥ интервьюта, Бүлүүгэ тулаайах оҕолор дьиэлэрэ тымныытын, саҥа сылга уларыйыылар, таҥха туһунан ырытыылар, сканворд, «Киэҥ сир», «Улуус олоҕо» бырайыактар, уус-уран кэпсээннэр о.д.а. киирдилэр.
«Cаҥа үүммүт сылга «Саха сирэ» хаһыат бастакы нүөмэрин туттуҥ. Былырыын «Сахамедиа» ыыппыт босхо сурутуу тэрээһинигэр кыттан, 30 тыһ. тахса киһи хаһыаппытын суруппута. Эрэлгит, итэҕэлгит иһин барҕа махтал. Быйыл «Саха сирэ» хаһыакка хас нэдиэлэ аайы саҥа бырайыактар тахсыахтара. Ол курдук, «Киэҥ сир» бырайыакка өрөспүүбүлүкэ историятын, иллээх-эйэлээх норуоттарын туһунан кэпсиэхпит, «Улуус олоҕо» хас биирдии улууһу сыныйан сырдатыа, «Сүрүн ыйытыы» — Ил Дархан дьону-сэргэни долгутар боппуруоска хоруйун билиһиннэриэ. Маны сэргэ, «Саха ыала», «Дьулурҕан», «Эдэр саас» сыһыарыыларбыт нэдиэлэ аайы солбуйа сылдьан тахсыахтара. Буруолуу сылдьар сонуннарбытын, ырытыылары, наадалааах сүбэлэрбитин, интэриэһинэй кэпсээннэрбитин edersaas.ru сайпытыгар билсиҥ. Саҥа үүммүт сылга ситиһиилээх буолуҥ! Улаҕата биллибэт информация киэҥ байҕалыгар мунумаҥ. «Саха сирэ» хаһыаты кытта бииргэ буол«, — диэн сүрүн эрэдээктэр Чокуур Гаврильев санаатын этэр.
Улуус кииннэригэр, Дьокуускайга эрдэ суруттарбыт ааҕааччыларга почтальон дьиэҕитигэр тиэрдиэҕэ. Нэһилиэктэр почтаттан ылаҕыт. Маны сэргэ Дьокуускайга атыы-эргиэн кииннэригэр, балыыһаларга, бааннарга, МФЦ о.д.а сирдэринэн анал стойкаларынан хаһыаты тарҕаттыбыт. Ылан ааҕыҥ.
