Босхо гаастааһын: Былаан бигэргэтиллибитин кэннэ сайаапкалары ылыахтара
Дойду бэрэсидьиэнэ Владимир Путин быйылгы Анал этиитигэр бөһүөлэктэр икки ардыларынааҕы гаас ситимиттэн олорор дьиэлэри оттукка босхо холбооһун туһунан этэн, бэс ыйын 1 күнүгэр Судаарыстыбаннай Дуума үһүс ааҕыыга гааһынан хааччыйыы туһунан сокуоҥҥа уларытыылары киллэриини ылыммыта. Бу сокуон ылыныллыытын Арассыыйа үгүс олохтоохторо үөрэ истибиттэрэ.
Сокуон олоххо киирэн, билигин нэһилиэнньэлээх пууҥҥа кэлбит гаас ситимиттэн дьиэ учаастагар диэри гааһы тардыы ороскуотун судаарыстыба уйунар буолла. Босхо гаастааһын бырагырааматыгар кыттыыга сотору кэминэн сайаапкалары хомуйуу саҕаланыахтаах.
«Сахатранснефтегаз» АУо гааһы тарҕатар ситимнэрин управлениетын кылаабынай инженерэ Петр Данилов иһитиннэрбитинэн, билигин бырагыраамаҕа хапсар уһаайбалары инвентаризациялааһын, гаастааһын былаанык, кыраапыгын оҥоруу ыыттыллар.
«Бырагыраамаҕа сурулларынан, олорор дьиэни бас билээччи бырааба баар буолара ирдэнэр. Ити биирэ. Иккиһинэн, өрөспүүбүлүкэ нэһилиэнньэлээх пууннарыгар гааһынан хааччыйыы схемата суох буолан, бырагыраама олоххо киириитин харгыстаһар. Дьэ билигин бу үлэлэнэн туһааннаах исписэлиистэр дьарыктанан эрэллэр», – диэн Петр Данилов бэлиэтээн эттэ.
edersaas.ru