Бүгүн, ахсынньы 4 күнүгэр, киэһэ 17.00 чаастан СӨ Росздравнадзор управлениетын салайааччыта Евгений Иннокентьев быһа эпииргэ тахсан өрөспүүбүлүкэҕэ эмп-томп балаһыанньатын кэпсээтэ уонна ыйытыыларга хоруйдаата.
Евгений Иннокентьев бүгүҥҥү күҥҥэ өрөспүүбүлүкэҕэ коронавирус дьаҥын эмтиир босхо эмтэр бүтэһик баартыйалара кэлбитин иһитиннэрдэ. Өрөспүүбүлүкэ бүддьүөтүттэн үп көрүллэн, ыарыылара анаалыһынан бигэргэтиллибит дьон босхо эминэн хааччыллыахтара.
Ол курдук «Парацетамол», «Арбидол», «Гексаметазол», «Амоксиклав», хааны убатар о.д.а. эмтэр кэлбиттэрин эттэ. Эминэн хааччыллыбыт киһиэхэ миэдиктэр эбэтэр волонтердар дьиэҕэ тиэрдэн биэрии өҥөтүн оҥоруохтара диэн Росздравнадзор салайааччыта эттэ.
Эпиир кэмигэр чөлгө түһүү, маасканы кэтии, «Арбидол» туһатын туһунан араас ыйытыылар киирдилэр. Бүгүҥҥү күҥҥэ Абый, Алдан, Усуйаана, Эбээн Бытантай, Дьааҥы, Нерюнгри, Мииринэй оройуоннарыгар эминэн хааччыллыы мөлтөҕүн салайааччы бэлиэтээтэ. Бу кыһалҕа сотору кэминэн быһаарыллыаҕа. Өрөспүүбүлүкэҕэ эминэн-томунан эргинэр улахан кууһунан атыылыыр алта тиэрдээччи баар. Дьоҕус урбаан сайдыытыгар кыра аптекалар үлэлэрэ эмиэ көдьүүстээҕин Евгений Иннокентьев бэлиэтээтэ.
Маны сэргэ салайааччы эми оҥорон таһаарар собуоттар күүстээхтик босхо тарҕаныахтаах эмтэри таһаарыынан дьарыктаналларын туһунан эпииргэ кэпсээтэ. Эмтэри маркировкалааһын кыһалҕата быһаарыллыбытын сырдатта. Итиэннэ эми-тому нэһилиэнньэҕэ тиэрдиигэ олохтоох дьаһалта кууһунан тиэрдэр тэрилтэлэри кытта быһа сибээскэ тахсыахтарын сөбүн бэлиэтээтэ.
Ульяна Захарова, «Саха сирэ» хаһыат, edersaas.ru