Мин сотору 81 сааспын туолабын. Холкуоска, сопхуоска 35 сыл салалтаҕа үлэлээн, биэнсийэҕэ тахсыбытым. Онон Дьааҥы улууһун Боруулаах нэһилиэгин кыһалҕаларын, тугу оҥоруохха сөбүн туһунан санаабын атастаһабын. Манна киин хочуолунайбыт суох, билигин даҕаны маһынан оттунан олоробут. Толору хааччыллыылаах диэн өйдөбүл олох суох. Ыал хамнаһа, биэнсийэтэ барыта маска барар. Мас тиэйэр тэрилтэ суоҕа атахтыыр.
Киин хочуолунай тутулуннаҕына даҕаны кытыы турар дьиэлэр кыайан холбонор кыахтара суох. Оччотугар үйэлэрин тухары маһынан оттунан олороллор дуо? Ол иһин, уотунан ититиллэр туһугар улахан кыамталаах электростанция эбэтэр чоҕунан оттуллар хочуоллар наадалар.
Кыһын дьаама хаһан, септик тутан, ваннаны, туалеты оҥоруохха сөп дииллэр. Маныаха үп-харчы биэрэн ИП-лары булан тэрийэр көдьүүстээх буолуоҕа. Аны сылгылаах ыалларга база тэринэллэригэр бырыһыана суох кирэдьиит наада. Ыал барыта 5-тэн элбэх биэлээх буоллаҕына, син дохуоттаныа этилэр.
Өрөспүүбүлүкэ кыахтаах тэрилтэлэрэ хоту хаалыылаах сирдэргэ кыра да буоллар көмө оҥороллоро буоллар дии саныыбын. Балыыһаҕа эмп сыаната ыарахан. Биһиэхэ олус туһалаах эмтээх оттор үүнэллэр, ону хомуйтарыахха. Уопсай баанньык суоҕа куһаҕан. Улахан атыыһыттарга бородуукта сыанатыгар субсидия биэрэллэрэ буоллар, улахан чэпчэтии буолуо этэ. Килиэпкэ эмиэ чэпчэтии көрүллэрэ ирдэнэр.
Петр СЛЕПЦОВ,
Дьааҥы улууһун Боруулаах нэһилиэгин олохтооҕо, Дьааҥы бочуоттаах гражданина,
үлэ, тыа хаһаайыстыбатын бэтэрээнэ.
Хаартыска: интэриниэттэн