Уопсастыба

Боруулааҕы тыатааҕы буулаата

Социальнай ситимнэринэн тарҕаммыт  тыатааҕыттан улаханнык эмсэҕэлээбит биэ эрэйдээх кулунун эмтэрэ турар хаартыската үгүс киһини харааһыннарда.

Ити хаартысканы кытта аны бөдөҥ тыатааҕы биэни тиниктээн бүтэрэн баран бэйэтэ баһа хампы ытыллан сытар хаартыската кэлбит. Хаартысканы Дьааҥыга, оттон сорохтор Өлүөхүмэҕэ буолбут диэн суруйбуттар. Үгүс ыйыталаһыы кэнниттэн биллибитинэн, бу иэдээннээх дьыала Дьааҥы улууһун Боруулаах нэһилиэгэр буолбута билиннэ. Биһиги тута Дьааҥы улууһун Боруулаах нэһилиэгин баһылыгар Евгений Матвеевич Юмшановка сибээскэ таҕыстыбыт.

— Бу хаартыска олус түргэнник өрөспүүбүлүкэни биир гына тарҕана охсубут эбит. Бэлиэтээн эттэххэ, сылгылардаах сиргэ өрүү тыатааҕы баар буолар. Быйыл  биһиги нэһилиэкпит икки бөһүөлэгэр Токумаҕа уонна Томторго тыатааҕы элбээтэ диэн этиэххэ наада. Бу иннинэ биир биэни эмиэ тыатааҕы тардыбыта, ол эрээри хаартыската тарҕамматах буолан, киэҥ араҥаҕа биллибэтэх буоллаҕа. Ити кулунун эмтэрэ турар биэ эчэйиитэ ыараханыттан бэйэтэ өлөөхтөөбүт. Кусчуттар, сылгы көрдөөччүлэр көрөн хаартыскаҕа түһэрбиттэр этэ. Биһиги Айылҕа харыстабылын министиэристибэтиттэн тыатааҕыны бултаһарга көҥүл ылбыппыт даҕаны билиҥҥитэ бултуу иликпит. Көҥүлбүт үс эрэ күн барар. Көҥүлү бүгүн, ыам ыйын 24 күнүгэр, ылбыппыт.  Өйүүн болдьоҕо ааһар. Онон тыатааҕыны бултуохпутугар диэри хаттаан көҥүл ыларбыт буолуо.

 

3
1
Telegram @edersaas20