Бүгүн, олунньу 14 күнүгэр, борокуратуура уорганнара ааспыт 2016 сыллааҕы үлэлэрин киэҥ ыҥырыылаах коллегияларын мунньаҕар ырытыстылар.
Вера МАКАРОВА, «Саха сирэ» хаһыат, https://edersaas.ru/
Манна РФ Генеральнай борокуруорун солбуйааччы Юрий Гулягин, сүрүн федеральнай иниспиэктэр Виктор Хохрин, Ил Түмэн мунньаҕын бэрэссэдээтэлин бастакы солбуйааччы Анатолий Добрянцев, СӨ бырабыыталыстыбатын бэрэссэдээтэлэ Евгений Чекин итиэннэ быраабы араҥаччылыыр уорганнар салайааччылара кытыннылар.
Өрөспүүбүлүкэ борокуруора Николай Пилипчук сүрүн дакылаатыгар иһитиннэрбитинэн, биһиги өрөспүүбүлүкэбитигэр 2016 сылга буруйу оҥоруу үрдээһинэ бэлиэтэммит — 12375 (2015 сылга 11846 этэ). Маныаха 2,2 төгүл «мобильнай» түөкүннээһин элбээбит, кэккэ улуустарга буруйу арыйыы мөлтөөбүт, барыллааһын силиэстийэ хаачыстыбата намтаабыт. Итинэн сибээстээн, борокуратуура быраабы араҥаччылыыр уорганнар буруйу оҥорууну утары үлэлэрин сүрүннээччи быһыытынан, ити хайысхатын күүһүрдэрэ ирдэнэр.
Сүрүн борокуруор бэлиэтээбитинэн, өрөспүүбүлүкэҕэ ыар уонна ураты ыар буруйу оҥоруу 15,6 %-нан, сокуоннай саастарын ситэ илик оҕолор сокуону кэһиилэрэ 15,7 %-нан, бэйэҕэ тиийинэн өлүү 50 %-нан уонна оҕолорго туһуламмыт буруйдар 1,6-нан аҕыйаабыттар.
2016 сылга киһи уонна гражданин быраабын тутуһуу эйгэтигэр борокуруордар 60 тыһ. тахса кэһиини булбуттар, мантан 14,5 тыһыынчата — дьон бэйэтэ кэлэн үҥсүбүтүнэн (итинтэн 10,5 тыһ. быһаарыллыбыт).
Киһи үлэҕэ быраабын көмүскээннэр, ааспыт сылга борокуратуура уорганнара 1,9 млрд солк. тахса суумалаах хамнаска иэһи төлөттөрөрү ситиспиттэр.
Коррупционнай сокуону кэһии 2894 чахчыта булуллубут (2015 сылга 3812 этэ), 508 киһи административнай уонна дьиссипилиинэ эппиэтинэһигэр тардыллыбыт. Борокуруордар көҕүлээһиннэринэн, 15 холуобунай дьыала тэриллибит (2015 сылга 26 этэ).
Бу сылга борокуратуура уорганнара сүрүн болҕомтолорун ууруохтара — социальнай эйгэҕэ (инбэлииттэр бырааптара, тулаайах оҕолору дьиэлээһин, дьону хаарбах туруктаах дьиэлэртэн көһөрүү, ас-үөл сыаната уо.д.а), экологияҕа, коррупцияны, экстремизмы уонна терроризмы утары охсуһууга.
Вера МАКАРОВА, «Саха сирэ» хаһыат, https://edersaas.ru/
Ааптар хаартыскаҕа түһэриилэрэ.