Бүгүн, сэтинньи 11 күнүгэр, Уус Алдан Бороҕонугар айти-киин арылынна. Бу туһунан СӨ Инновацияҕа миниистирэ Анатолий Семенов «Инстаграмҥа» быһа эпиир кэмигэр иһитиннэрдэ.
Миниистир этэринэн, бу оройуоннарга арыллыбыт алтыс айти-киин буолар эбит. Уус Алдан улууһа бу сыл ыам ыйыгар уонна бэс ыйыгар айти-киин тэриллэригэр ыытыллыбыт куонкуруска кыайбыт. Министиэристибэ биир мөлүйүөн солкуобайга көмпүүтэрдэри, наадалаах тэрили атыыласпыт. Оттон оройуон дьаһалтата эбийиэги өрөмүөннээбит. Саҥа кииҥҥэ оҕолор үөрэнэллэрин таһынан, нэһилиэнньэ цифровой сайдыылаах буоларыгар эмиэ үлэлэр ыытыллыахтара.
Арыллыыга миниистир Анатолий Семенов сырытта. Кини быһа эпииргэ өрөспүүбүлүкэ олохтоохторуттан киирбит ыйытыыларга хоруйдаата. Оройуоннарга оптоволокно интэриниэти бэрэбиэркэлээн, кини куруук миэстэтиттэн быһа эпииргэ тахсарын иһитиннэрдэ.
Национальнай бырайыак чэрчитинэн Уус Алдан өссө уон нэһилиэгэ түргэн интэриниэккэ холбонуоҕа диэн миниистир эттэ. Итиэннэ улуус дьаһалтатын кытта мунньахтаан, 2022 сылга ыытыллар норуоттар оонньууларын сырдатыы, быһа эпииргэ тахсыы тула кэпсэппиттэрин туһунан бэлиэтээтэ.
edersaas.ru