Госдуумаҕа бородуукта толуоннарын (карточкалары) киллэрэри өйөөтүлэр. Бу миэрэ дойдуга оҥоһуллар олохтоох бородуукталары өйүүр уонна кыаммат ыалларга көмөлөһөр сыалтан киллэриллэр.
Госдуума бырамыысыланнаска уонна атыыга-эргиэҥҥэ кэмитиэтин бэрэссэдээтэлэ Владимир Гутенев иһитиннэрбитинэн, уруккуттан да маннык бородуукта толуоннарын киллэрэри туруорсаллар. Бу күһэйии буолбакка, дьоҥҥо эбии көмө миэрэтэ буолар.
“Арассыыйа билигин бэйэтин ас бородууктатынан толору хааччынар. Биһиги тыа хаһаайыстыбабыт бородууксуйатын күрэстэһэр кыаҕа улахан. Онон квота быһыытынан, тас дойдуларга таһаарары өссө хааччахтыыбыт. 2022 сылга табаар, бородуукта сыаната ортотунан 6-7% үрдүүрэ күүтүллэр, онон кыаммат дьоҥҥо бу төһүү көмө буолуоҕа”, — диэн кини этэр.
Ангелина Васильева, “Саха сирэ” хаһыат, edersaas.ru
Хаартыска: mail.ru