Бородуукта сыанатын аһара үрдэппит урбаанньыттар миэрэҕэ тардыллыахтара
Арассыыйа уонна Украина сыһыаннаһыыларыттан сылтаан Арҕаа дойдулар бииргэ куомуннаһан биһиги дойдубутугар экэнэмиичэскэй сааҥсыйалары киллэрэн, улахан кириисиһи үөскэтэ сатыыллар.
Кулун тутар 16 күнүгэр РФ Бэрэсидьиэнэ Владимир Путин РФ уонна эрэгийиэннэр бырабыыталыстыбалара баар балаһыанньаҕа сөптөөх миэрэни ылынан үлэлииллэригэр аналлаах мунньаҕы ыыппыта. Бу чэрчитинэн Саха сиригэр экэниэмикэни бөҕөргөтүүгэ аналлаах миэрэлэр ылыллыбыттара.
Бүгүн Ил Түмэн дьокутааттара СӨ бырабыыталыстыбатын салалтатын кытта баар сааҥсыйалартан өрөспүүбүлүкэ экэниэмикэтэ оҕустарбатын туһугар туох үлэ ыытылларын, туох миэрэлэр ылыллалларын туһунан кэпсэттилэр, быһаарыстылар. Мунньаҕы Ил Түмэн экэнэмиичэскэй, инвестиционнай уонна бырамыысыланнай бэлиитикэҕэ сис кэмитиэтин бэрэссэдээтэлэ Павел Петров үүннээн-тэһииннээн ыыта.
Саха сиригэр экэниэмикэ бигэ тирэхтээх буоларыгар туох миэрэлэр ылыллыбыттарын туһунан СӨ Бырабыыталыстыбатын бэрэссэдээтэлин бастакы солбуйааччы Кирилл Бычков иһитиннэрдэ. Бастатан туран, инвестиционнай бырагырааманан быйыл ылыллыбыт былаан олоххо хайаан да киириэхтээҕэ ыйылынна. Ил Дархан Айсен Николаев бу боппуруоска үбү сарбыйыы эҥин тахсыа суохтааҕын эрдэ ыйбыта. Иккис сүрүн боппуруоһунан бородууктанан, табаарынан хааччыйыы буолар. Бу хайысханы быһаарыыга сүрүн оруолу урбаанньыттар ылыллар. Эрэгийиэннээҕи бааннар урбаанньыттар инники өттүгэр саппаас бородууктанан хааччыйалларын инниттэн сүрүн ставка сорох бырыһыанан уйуналларыгар субсидияны көрөллөрүгэр сөптөөх миэрэ ылыллыаҕа. Кирилл Бычков быһаарбытынан, урбааны өйүүр пуонда уонна «Алмазэргиэнбанк» урбаанньыттарга чэпчэтиилээх сойуомунан көмөлөһөллөрүгэр бүддьүөттэн өйөбүл бэриллиэҕэ. Ону тэҥэ, Саха сиригэр аччыгый биисинэһинэн дьарыктанааччыларга нолуоктарын кыччатыы миэрэтэ ылыллыбыт.
Дьиэ кэргэҥҥэ кыаммат араҥаҕа улахан болҕомто ууруллуохтааҕа этилиннэ. Владимир Путин 8-тан 16-гар диэри саастаах оҕолордоох кыра дохуоттаах ыалларга көмө оҥоһуллуохтааҕын эппитэ, бу хайаан олоххо киириэхтээх. Манна өрөспүүбүлүкэ хааһынатыттан 412 мөл. солк. көрүлүөҕэ уонна РФ бүддьүөтүттэн ити сыалы толуйууга 6 млрд солк. тыырыллыахтаах.
Онон өрөспүүбүлүкэ экэниэмикэтэ бигэ туруктаах буоларыгар сөптөөх миэрэлэр ылылла тураллар. Сүрүн дакылаат кэнниттэн дьокутааттар ыйытыылары биэрдилэр, кэккэ этиилэрин иһитиннэрдилэр. Олортон сүрүннэрин билиһиннэрэр буоллахха, дьокутааттар төһө даҕаны сыана хонтуруолга ылылларын үрдүнэн билигин үгүс маҕаһыыннарга сыана үрдүү турарын эттилэр. Бу, кырдьык, баар дьыала. Сорох урбаанньыттар куһаҕантан ас таһаарына охсоору үрдэтэр да түгэннэр элбэхтик тахсыталыыр. Манна хонтуруол өссө күүһүрүө диэн быһаардылар. Борокуратуура ылсан эрэрин туһунан иһитиннэрдилэр. Кирилл Бычков быһаарарынан сыананы үрдэтии Саха сиригэр эрэ ыытыллар буолбатах, Арассыыйа үрдүнэн баар хамсааһын. Маны сүрүннүүргэ күүстээх үлэ баран эрэр, этэргэ дылы, полиция уорганнара кытары кыттыһан эрэллэр эбит. Онон урбаанньыттар сыананы аһара үрдэтиэ суохтаахтарын туһунан эттилэр.
Александр ТАРАСОВ.