Бырабыыталыстыба мунньаҕар бородуукта хаачыстыбатын хааччыйар миэрэлэри ылынар туһунан сокуон барылын ылыннылар. Бу сокуон өрөспүүбүлүкэҕэ тастан киллэриллэр уонна Саха сиригэр оҥоһуллар бородуукта хаачыстыбатын хонтуруоллууру күүһүрдүөҕэ диэн СИА суруйар.
Тыа хаһаайыстыбатын миниистирэ Александр Атласов иһитиннэрбитинэн, бу маннык сокуон оҥоһуллуохтааҕын туһунан соругу Ил Дархан 2019 сылтан туруорбута. Сокуон бородууксуйа хаачыстыбатын үрдэтэргэ баар ирдэбиллэри, ыстандаартары, быраабылалары күүһүрдүөхтээх. Сокуон барылын оҥорорго алта эрэгийиэн уопутун туһаннылар.
Ол курдук, «Продукт Якутии» диэн баҕа өттүнэн оҥоһуллар эрэгийиэннээҕи маркировка баар буолуоҕа. Бородуукта хаачыстыбата бэрэбиэркэлэммитин кэннэ, маннык маркировка бэриллиэҕэ. Бу маркировка үрдүк хаачыстыбаны мэктиэлиир.
— Бүгүҥҥү күҥҥэ маннык сокуон олус наадалаах. Атын эрэгийиэннэргэ барыларыгар кэриэтэ хаачыстыбатын хонтуруоллуур отделлар, лабораториялар үлэлииллэр. Аҕалыллар да, эрэгийиэҥҥэ оҥоһуллар да ас-үөл хаачыстыбата үрдүк буолуохтаах. Бу сокуону биһиги өр күүппүппүт, — диэн бырабыыталыстыба бэрэссэдээтэлэ Андрей Тарасенко бэлиэтээтэ.
Ангелина Васильева, “Саха сирэ” хаһыат, edersaas.ru
Хаартыска:СИА.