Бороҕоҥҥо — саҥа уһуйаан

Бороҕоҥҥо 75 миэстэлээх уһуйаан тутулунна. Уһуйаан аһыллыытын үөрүүлээх түгэнигэр СӨ Ил Дархана Айсен Николаев ыалдьыттаабыта тыа сирин үлэһит дьонун үөрүүтүн икки бүк үрдэттэ.

«Өрөспүүбүлүкэҕэ «Демография» национальнай бырайыак иитинэн элбэх уһуйаан тутулла турар. Оҕолор тупсаҕай усулуобуйаҕа сылдьан иитиллэн-такайыллан тахсыахтаахтар. Өссө сүрүнэ, биһиги көннөрү уһуйааннары эрэ тутар буолбатахпыт, үөрэнэргэ бары усулуобуйа толору тэриллибит кыһаларын тутабыт«, — диэн Айсен Николаев этиитэ дьон-сэргэ сүргэтин улаханнык көтөхтө.

Биир мэндиэмэннээх оҕо саадын уопсай иэнэ 883 кв м. Бу «Демография» национальнай бырайыак чэрчитинэн, «Алмаасэргиэнбаан» кыттыылаах тутулунна. Сүрүн бэдэрээччит «Силим» тутар хампаанньа.

Саҥа, сырдык, киэҥ-куоҥ дьиэҕэ бөлөхтөр сылдьар сирдэрин таһынан, музыканан уонна гимнастиканан дьарыктанар саала, психолог уонна логопед хосторо, методическай хос, мэдиссиинэ блога бааллар. Бөлөхтөр хосторо оҕоҕо сөп түбэһэр табыгастаах миэбэлинэн, үөрэтэр аныгы тэриллэринэн: маркерынан суруйар магниттаах дуосканан,  цифровой пианинонан хааччыллыбыттар. Физкултууралылларыгар, успуордунан дьарыктаналларыгар сүүрэр дорожкалаахтар, велотренажердар, сырылыыр сир, батут, сухой бассейн бааллар. Оҕо саада каадырдарынан толору хааччыллыбыт.

Уһуйаан сэбиэдиссэйэ Галина Матвеева кэпсээбитинэн, саҥа дьиэҕэ билиҥҥитэ икки бөлөх баар. Олортон биирдэстэригэр үстэригэр диэри саастаах кырачааннар сылдьаллар.

«Онон дьааһылаҕа уочарат үөскүүрэ тохтоото. Ийэлэр үлэлэригэр эрдэ тахса кыахтаннылар. Маны таһынан, саҥа уһуйааҥҥа өссө доруобуйаларынан хааччахтах оҕолор сылдьалларыгар табыгастаах усулуобуйа тэрилиннэ. Пандус, көтөҕөн таһаарар тэрил бааллар, тротуарданна«, — диэн кэпсиир.

Бэлиэтээн этэр буоллахха, өрөспүүбүлүкэҕэ биир кырдьаҕас уһуйаан Бороҕоҥҥо 1943 сыллаахха аһыллыбыт.