Бу дьыл муус устар 18 күнүгэр, күнүс 13.30 чаас саҕана, Дьокуускайтан Уус Алдан Бороҕонугар айаннаан испит такси 70-с километрга суол быһылааныгар түбэспитин туһунан иһитиннэриибит сайтпытыгар муус устар 19 күнүгэр «Уус Алдан таксита суол быһылааныгар түбэстэ» диэн матырыйаалга бэчээттэммитэ.
Санатар буоллахха, онно суоппар уонна хас да киһи массыына инники тааһынан, кэлиҥҥи уонна ойоҕос ааннарынан эһиллибиттэр этэ. 27 саастаах суоппар уруулун кыайан салайбакка, массыыната уҥа диэки халыйан, үстэ эргийэн, күбүөккэ тиийэн түҥнэстибитэ.
Ол түмүгэр, биир дьахтар сиһин тоноһоҕун эчэппитэ, биир киһи мэйиитэ доргуйбута. Барыта 8 киһи айаннаан испит этэ.
Медицинскэй туоһулааһын онно бигэргэппитинэн, суоппар арыгы испэтэх.
Уус Алдан улууһун борокуратуурата бу суол быһылаанынан бэрэбиэркэ ыытан быһаарбытынан, бу массыына айанныырга бобуулаах итэҕэһэ-быһаҕаһа элбэх эбит.
Ол курдук, икки олбоҕо курдара суох эбит, ол түмүгэр, чуолаан, ол олбохторго олорон айаннаан испит икки киһи эмсэҕэлээбит.
Аны туран, суоппар айанныан иннинэ медосмотр барбатах, массыынатын техническэй туругун бэрэбиэркэлэппэтэх.
Маны таһынан, суоппар дьону өрүһүнэн суол сабыллан турдаҕына, Кангалассы—Суотту маршрутунан тиэйэн айаннаабыт.
Борокуратуура бэрэбиэркэтин матырыйаалларыгар олоҕуран, силиэстийэ уорганнара РФ Холуобунай кодексатын 238-с ыст. 1 чааһынан, ол эбэтэр, туһанааччылар олохторугар уонна доруобуйаларыгар куттал суоһаабат ирдэбиллэригэр сөп түбэспэт өҥөлөрү оҥоруу бэлиэтэ баарынан, дьыала тэрийдилэр.
Дьыаланы силиэстийэлээһин улуус борокуратууратын хонтуруолугар сылдьар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.