Бороҕоҥҥо «Спортивная слава Усть-Алданского улуса» быыстапка дьон сэҥээриитин ылла

Бу күннэргэ Уус Алдан Бороҕонугар өрөспүүбүлүкэ араас муннуктарыттан үгүс киһи муһунна. Спортсменнар, ыалдьыттар күрэхтэһиилэртэн быыс булан култуурунай тэрээһиннэргэ сылдьаллар. В.В. Никифоров-Күлүмнүүр аатынан «Тойон Мүрү» култуура дыбарыаһыгар    хас да  быыстапка туруорулунна.

Бэҕэһээҥҥиттэн Култуура дыбарыаһыгар икки этээһинэн саахымат, дуобат күрэхтэһиилэрэ саҕаламмыта. Онтон үһүс этээскэ быыстапкалар ыытыллаллар. Быйыл саҥа тутуллан үлэҕэ киирбит Култуура дыбарыаһыгар үгүс киһи киирэн ааһар. Онон күннэтэ «Спортивная слава Усть-Алданского улуса» диэн  уонна да атын  быыстапкалары сүүһүнэн киһи сэҥээрэ көрөр.

«Спортивная слава Усть-Алданского улуса» быыстапкаҕа улууска успуорт атаҕар туруутун, сайдыытын бары кэрчик кэмнэрэ көстөр. Итиэннэ улуустан төрүттээх спортсменнар, бэтэрээннэр хаартыскалара, ситиһиилэрэ туруоруллубуттар.

Дьокуускайтан  Спортивнай оонньуулары анаан-минээн кэлэн  көрө  сылдьар Галина Игнатьева: «Бороҕоҥҥо Спортивнай оонньуулары көрө таарыйа бу Күлүмнүүр аатынан Култуура дыбарыаһыгар сылдьар санаалаах этим. «Спортивная слава Усть-Алданского улуса»  быыстапканы  ордук интэриэһиргээн көрдүм. Баай экспозициялаах быыстапка»,— диэн санаатын үллэһиннэ.

edersaas.ru