Уус Алдан улууһугар, Бороҕоҥҥо, 450 оҕо үөрэнэр саҥа оскуолата тутуллуо.
Бу туһунан СӨ тутууга уонна дьиэни-уоту кэтээһиҥҥэ судаарыстыбаннай управлениетыгар
иһитиннэрбиттэр. Сакаасчыт — «СӨ судаарыстыбаннай сакаасчыт сулууспата» ГКУ.
«Бырайыагынан үс мэндиэмэннээх дьиэ тутуллар, уопсай иэнэ 5854,87 кв. м. Аныгы кэм ирдэбилигэр сөп түбэһиннэриллибит тутууга үөрэнэр 17 хос, үс лаборатория, мастарыскыайдар, успуордунан уонна гимнастиканан дьарыктанарга саалалар, 150 оҕо олорон аһыыр остолобуойа, бибилэтиэкэ, методическай хостор, 270 миэстэлээх, анал хостордоох актовай саала былааннаналлар«, — диэн СӨ тутууга уонна дьиэни-уоту кэтээһиҥҥэ судаарыстыбаннай управление салайааччыта Павел Аргунов бэлиэтээн эттэ.
Бырайыакка доруобуйаларыгар хааччахтаахтар сылдьалларыгар куттала суох буоларын курдук, бары усулуобуйа учуоттаммыт. Пандустар, киэҥ-куоҥ ааннар, кирилиэс барыта табыгастаах буоларыгар толкуйданар. Оскуола таһынааҕы сиргэ-уокка күн уотуттан, ардахтан хаххалыыр күлүктээх оонньуур сирдэр, физкултууралыыр, успуордунан дьарыктанар зона, хаһаайыстыбаннай-бытовой былаһаакка баар буолуохтара.
Саҥа оскуоланы тутуу 2 №-дээх Мүрү оскуолатын сиригэр былааннанар. Манна даҕатан эттэххэ, 1973 сыллаахха тутуллубут мас оскуола улууска саамай элбэх үөрэнээччилээҕинэн биллэр.
+1
+1
+1
+1
+1
+1
+1