Уус Алдан улууһугар Бороҕоҥҥо энергетиктэр оҕо былаһааккатын өрөмүөннээтилэр.
«Якутскэнерго» ПАУо киин электрическэй ситим «Энергия добра» аахсыйатыгар Бороҕоннооҕу РЭС кэлэктиибэ кыттыста. Бу үгэс буолбут тэрээһиҥҥэ энергетиктэр өрөспүүбүлүкэ хас биирдии улууһугар оҕо былаһааккаларын өрө тардаллар, өрөмүөннүүллэр.
Оҕо көмүскэлин күнүн көрсө, кинилэр Бороҕоҥҥо Энергетиктэр түөлбэлэригэр, былаһааккаҕа ахсыа буолан тахсан, күн аҥаарын устатыгар сирин-уотун ыраастаатылар, тэрилин өрөмүөннээтилэр, оонньуур сирдэри, ыскамыайкалары, күрүөтүн-хаһаатын чаҕылхай өҥнөрүнэн кырааскалаатылар.
Бороҕоннооҕу РЭС начаалынньыга Николай Седалищев бэлиэтииринэн, бу былаһаакка түбэһиэхчэ талыллыбатах. Бастатан, РЭС баазатыттан чугаһын таһынан, туруга мөлтөөбүт, киһини үөрдүбэт көстүүлэммит.
Оттон билигин Уус Алдан улууһун энергетиктарын эйэлээх кэлэктиибин кыһамньытынан, оҕолор оонньуур былаһааккалара тубуста, оҕолору тардар, умсугутар көрүҥнэннэ. Онон чугастааҕы түөлбэ оҕолоро манна кэлэр буоллулар.
«Оҕо бырааһынньыгар маннык бэлэҕи оҥорбуттарын иһин олохтоохтор, ордук оҕолор үөрэллэр, махтаналлар. Бороҕоннооҕу РЭС үлэһиттэригэр төрөөбүт нэһилиэкпитин сайыннарыыга кыһамньыларын иһин махтанабыт!», -диэн Мүрү нэһилиэгин дьаһалтатын үлэһиттэрэ Инстаграм ситимигэр суруйаллар.
«Якутскэнерго» ПАУо киин электрическэй ситимин пресс-сулууспата
+1
+1
+1
+1
+1
+1
+1