Саҥа дьыл бырааһынньыгар балбааҕынан, ноһуомунан сыл бэлиэтин, кыылы-сүөлү, харыйаны оҥорор дьоҕурдаах дьоммут сыллата элбээн иһэр чинчилээхтэр курдук. Санатар буоллахха, биэс миэтэрэ үрдүктээх харыйаны балбаахтан оҥорбут Өлүөхүмэ улууһун 1 Нөөрүктээйи олохтооҕо Анатолий Филипповтыын уонна Нам Модутугар олорор табаны, ыты сыбаан таһаарбыт, чочуйбут Никита Захаровтыын кэпсэтиибин соторутааҕыта таһааран турабын.
Бүгүн ураты чочуйуутунан дьону-сэргэни аан бастаан улаханнык соһуппут Таатта улууһун Уолба нэһилиэгин олохтооҕо Михаил Боппосовтыын кэпсэттим. Уопуттаах маастар быйылгы оҥоһугун балачча өргө диэри кимиэхэ да быктарбакка, көрдөрбөккө, кэпсээбэккэ сырытта. Онон биһиги күннэри-түүннэри кэтээһин түмүгэр, хата, оруобуна бириэмэтигэр таба тайанан кэпсэттибит.
—Быйылгы үлэбин лоп курдук ахсынньы 1 күнүттэн саҕалаабытым. Бастатан туран, иллээх, үөрэ-көтө, Саҥа дьылынан эҕэрдэлии көрсөр үс сибиинньэни оҥордум.
Дьиэ тута сылдьар сибиинньэни үөһээ таһааран туруораарыбын, аан бастаан аллараа балачча халыҥ сыарҕалаабытым. Онно элбэх ноһуом барда. Күн аайы матырыйаал төһө тахсарынан таһааран, кыра-кыралаан таптайа, оҥоро сырыттым.
Ол кэнниттэн, ити үөһээ сибиинньэ сыбаан оҥорон туруордум. Тааһынан дьиэ-уот тута сылдьар. «Привеет!» диэн дьоҥҥо-сэргэҕэ далбаатыыр. Бары бас билэр дьиэлээх-уоттаах, байылыат олохтоох, чэгиэн доруобуйалаах буолуҥ диэн үтүөнү баҕарар, күүтүүлээх бырааһынньыгынан эҕэрдэлиир.
Аллараа турар сибиинньэлэр атахтара арматуралаах. Ол иһин, атахтарын төбөтүгэр өндөччү соҕус тураллар. Аны оҥоро сырыттахха, араас толкуй барыта киирэн иһэр. Холобур, ити батсааптан көрөн, санаа киирэн, хормуоска оҥорон биэрбитим. Иккиспин балалайкалаабытым.
Онон Саҥа дьыл бырааһынньыгынан сүрэхтээх үлэһит, олоҕу сайыннарсар, дьиэни-уоту тутар, эйэлээх, үөрүнньэҥ, дьону-сэргэни эҕэрдэлии көрсөр үтүө майгылаах сибиинньэлэри чочуйдум, — диэн кэпсээтэ.
Уран тарбахтаах маастар быйылгы оҥоһуутун бүгүн бар дьонугар көрдөрөр.
Санатан эттэххэ, бу сыллар усталарыгар Михаил Трофимович коллекцията балачча элбээтэ.
Өҥөйөн турар икки миэтэрэ үрдүктээх муударай Моҕой; 3,5 миэтэрэ үрдүктээх, 4,2 миэтэрэ уһуннаах Өҥөй Бөтүүк; модьу-таҕа көрүҥнээх элэккэй Дракон; пальмаларга хатаастыбыт, сурук ааҕар көрдөөх, иллээх эбисийээнэлэрэ (сурук ис хоһооно, сүөһү ноһуомун туһатын, сайынын түптэҕэ ааттааҕын, үөнтэн-көйүүртэн, бырдахтан харыстыырын, сылааһы тутарга көмөлөөҕүн, о.д.а. суруллубутун олохтоохтор ааҕа-ааҕа хайҕаабыттарын, маны эдэр ыччат көрөн өйдүөҕүн этэллэр); дьиҥ сылгылар саҕа ахсым аттар; үөрбүт-көппүт көрүҥнээх козалар; түөрт атахтаах доҕотторбут саҕа улаханнаах киһиэхэ бэриниилээх ыттар уонна ураһа (туоннанан ноһуом киирбит үлэтэ); ону сэргэ, тааҥката, Рунет биир персонаһа Ждун, о.д.а. харахха ыраахтан быраҕыллаллар, дьону-сэргэни үөрэ көрсөллөр. Манна даҕатан эттэххэ, маастар быраата эмиэ маастар. Иннокентий Аан дойду дьахталларын күнүнэн, убайын Михаил курдук, ноһуомунан эҕэрдэ суруга киэҥ сири тилийэ көппүтэ, ыал ийэлэрин, эбэлэрин, маанылаах кыргыттарын истиҥник үөрдүбүтэ, долгуппута.
Сардаана БАСНАЕВА, “Саха сирэ” хаһыат, edersaas.ru
Хаартыскалар: интэриниэттэн, Михаил Боппосов дьиэтээҕи архыыбыттан