Боотулууттан төрүттээхтэр төрөөбүт нэһилиэктэригэр көмөлөстүлэр
Үөһээ Бүлүүгэ, Боотулууга, биир дойдулаахтара Дьокуускай куорат олохтооҕо Алексеева (Максимова) Капитолина Михайловна сэтинньигэ ыҥырыы таһааран, Боотулуу балыыһатыгар билигин туттарга аналлаах эмтиир тэриллэри ылан көмөлөһөргө харчы хомуйуута саҕаламмыта.
«Билиҥҥи туругунан 100.000 солкуобайтан тахса үп хомулунна. Балыыһа үлэһиттэрин этиилэринэн Дьокуускай к. «Медтехника» тэрилтэтиттэн сакаастаммыт тэриллэри урбаанньыт А.П.Титова бэйэтин массыынатынан босхо аҕалан биэрдэ. Онно 2.890 солк. сыаналаах
пульсоксиметр, 23.000 солк. рециркулятор, 7.800 солк. кварц аҕалылыннылар. 60.000 солк. тахса сыаналаах кислороднай концентратор сакаастаммыта Москваттан тохсунньуга кэлиэхтээх. Харчы хомуйааһыныгар үбүнэн кыттыспыт бар дьоммутугар махталбын биллэрэбин. Балыыһаҕа көмө акцияны манан тохтоппоппут. Бу счёкка үбү хомуйааһыны салгыы ыытабыт. Нэһилиэк, улуус уопсай кыһалҕатыгар үбүнэн кыттыһыы диэн былыргы өбүгэлэрбититтэн иһэр үтүө дьыала буолар. Норуот күүһэ- көмүөл күүһэ! Биһиги күүспүт — сомоҕолоһууга!» — диэн
нэһилиэк баһылыга Александр Поскачин инстаграмҥа суруйда.
edersaas.ru