Бүгүн, муус устар 22 күнүгэр, Владимир Ленин төрөөбүтэ 151 сылыгар анаан Үөһээ Бүлүү улууһун Боотулуу олохтоохторо үлэ субуотунньугар таҕыстылар.
Ол курдук суулларыллыбыт маһы состорууга биир ДТ-75, икки МТЗ-82 тыраахтардар үлэлээтилэр. Уопсайа
субуотунньукка 24 киһи, 15 «Штиль» бензопила үлэлээтэ.
Субуотунньук түмүгүнэн 83 куб м мас эрбэнэн саһааннанна уонна бү күннэргэ кырдьаҕастарга тиэллиэҕэ. Итиэннэ 25 куб м дьыалабыай мас бэлэмнэннэ.
Былырыын эмиэ маннык үлэ ыытыллыбыта. «Боотулууга бу тэрээһини үгэскэ кубулутан, сыл аайы ыытыахха», — диэн нэһилиэк аҕа баһылыга Александр Поскачин бигэргэттэ.
⠀
Тэрээһин сарсыарда 10 чаастан саҕаланан баран күнүс 3 чаас саҕана түмүктэннэ.
⠀
I миэстэ — «Саһарҕа» түөлбэ (сал. Захарова З.В.);
II миэстэ — «Булуҥ» түөлбэ (сал. Слепцова Н.Н.);
III миэстэ — «Чэчир» уонна «Ойоҕос» холбуу хамаандалара ылан мэтээллэринэн уонна грамотанан наҕараадаланнылар.
Кыттыбыт, үлэни көҕүлүттэн туппут дьоммутугар барҕа махталбытын тиэрдэбит. Эһиги күүстээх, сэниэлээх илиилэргит тиийбит үлэлэрин түмүгэ, кырдьаҕастарбытыгар кыракый да кыһамньы, өйөбүл, көмө буолан, сылаастык ахтылыннын диэн баҕа санаабытын этэбит. Доруобай, чэгиэн-чэбдик сылдьыҥ!
⠀
Марта Архипова, Үөһээ Бүлүү, Боотулуу