Оҕо көмүскэлин күнүгэр Дьокуускай куорат бары болуоссаттарыгар оҕолорго анаммыт бырагыраамалаах бырааһынньыктааҕы тэрээһиннэр буола тураллар. Бэл диэтэр, сорох тэрилтэлэр аниматордары ыҥыран, оонньотон, босхо мороженай түҥэтэн, оҕолорго бырааһынньык тэрийдилэр.
Комсомольскай болуоссакка сарсыардаттан ырыа-тойук дьиэрэйдэ, үҥкүү-битии, күлүү-салыы дэлэйдэ, оҕо саҥата чугдаарда. Буоларын курдук, манна оҕолорго сыһыаннаах араас тэрилтэлэр бэйэлэрин бырагыраамаларын үлэлэттилэр.
Үөрэх миниистирэ Ирина Любимова оҕолору эҕэрдэлээтэ. Кини бүгүҥҥү күҥҥэ өрөспүүбүлүкэҕэ хаачыстыбалаах үөрэх баарын, оҕо доруобай буоларыгар, дьоҕурун сайыннарарыгар, спордунан дьарыктанарыгар бары усулуобуйа тэриллэрин туһунан эттэ. Бу сайыны туһалаахтык атааралларыгар баҕарда.
Ону тэҥэ, ыччат миниистирэ Петр Шамаев, физкультура, спорт миниистирэ Леонид Спиридонов эҕэрдэлээтилэр, ситиһиилээх оҕолорго, төрөппүттэргэ Махтал суруктары туттардылар.
Болуоссакка циркэ, айар кэлэктииптэр кыттыылаах кэнсиэртэр, араас куонкурустар, маастар-кылаастар, флешмобтар, оонньуулар тиһигин быспакка ыытылыннылар. Төрөппүттэргэ логопед, социальнай педагог, психолог сүбэлэри-амалары биэрдилэр. Аан дойду, Европа, Арассыыйа чөмпүйүөнэ Дайаана Алексеева уонна гроссмейстер Иван Токусаров оҕолору кытары хас да дуоскаҕа тэҥинэн оонньоотулар.
Көҥүл тустууга оҕолорго күрэхтэһии буолла, комментатор Көрдүгэн саҥата биир кэм ньиргийэн олордо. “Сластена” тэрилтэ босхо мороженайдары түҥэппитэ былдьаһыгынан барда.
Оттон Оҕо Дыбарыаһын иннинээҕи болуоссакка туспа бырагырааманы тэрийдилэр. Холобур, “Кванториум” технопаарка дьарыктаммыт оҕолор бэйэлэрэ оҥорбут бырайыактарын көрдөрдүлэр. Хаамар роботтар, водороднай уматыгынан көтөр квадрокоптердар, лего-оонньуурдар, о.д.а. оҕолор болҕомтолорун тартылар. Оҕолорго туттаран-хаптаран, виртуальнай ачыкы кэтэрдэн оонньотон, лазернай станокка үлэлэтэн, бэркэ астыннардылар. “Кванториумҥа” сыллата 1 тыһыынчаттан тахса оҕо дьарыктанар.
Ону тэҥэ, Оҕо айымньытын дьиэтин педагогтара оҕолору урукку оонньуулары сөргүтэн, үөрэтэн, оонньотон, интэриэстэрин тартылар. Орджоникидзе болуоссатыгар туспа бырагыраама үлэлээтэ.
Ангелина Васильева, “Саха сирэ” хаһыат, edersaas.ru
Хаартыска: СИА.