Бүгүн Дьокуускай куорат Орджоникидзе болуоссатыгар «Кыайыы сааһа» тэрээһин ыытылынна, сэрии уонна тыыл бэтэрээннэрэ, сэрии оҕолорун көрсүһүүлэрэ тэрилиннэ.
Тэрээһин кэмигэр болуоcсакка байыаннай тиэхиньикэ быыстапката буолла, ьустубут дьон саллаат хааһытын амсайдылар. Бэтэрээннэргэ анаан «Туймаада» ансаамбыл кэнсиэрдээтэ. Бэтэрээннэри чиэстээһини кытта үгэс курдук, призывниктары аармыйаҕа атаардылар. Бу күн ытык чиэстэрин толоро барар 15 эдэркээн оҕону алгыстарын тиэртилэр.
Байыаннай комиссариат бэрэстэбиитэлэ, 2 рангалаах капитан Семен Афанасьев: «Саха сирин призывниктара куруутун туйгуннар ортолоругар сылдьаллар. Биһиги уолаттарбыт ытык иэстэрин чаҕылхайдык толоруохтара диэн эрэнэбин. Өйдөтөн эттэххэ, саастарынан аармыйаҕа сулууспалыы барар саллааттар байыаннай операцияҕа кыттыбаттар, ол туһунан дойду бэрэсидьиэнэ Владимир Путин уонна Арассыыйа главнокомандующайа Сергей Шойгу этэн тураллар. Уолаттар, этэҥҥэ сулууспалааҥ!” — диэн алгыс тылын тиэртэ.
Бэтэрээннэри куорат салалтата, мэр Евгений Григорьев, куорат Дууматын бэрэссэдээтэлин бастакы солбуйааччы Евдокия Евсикова эҕэрдэлээтилэр. Кэнсиэр кэмигэр полевой куукуна аһын кырдьаҕастарга саллаат таҥастаах ыччаттар түҥэттилэр.