Бэҕэһээ, балаҕан ыйын 2 күнүгэр, Ил Дархан Айсен Николаев Амма улууһугар үлэлээбитэ. Айсен Сергеевич Болугурга элбэх оҕолоох Таппыровтары саҥа дьиэлэммиттэринэн эҕэрдэлээтэ.
Ыал аҕата Артур Таппыров соҕотоҕун түөрт кыра оҕону көрөр-истэр. Улахан кыыһа Ариана сэттис кылааска, уола Артур бэһис кылааска үөрэнэллэр, орто кыыһа Ангелина быйыл бастакы кылааска киирдэ уонна кыра уола Ваня уһуйааҥҥа сылдьар.
Болугур олохтоохторо уонна оройуоннааҕы «Спецназ добра Якутии» хамсааһын актыбыыстара өрөспүүбүлүкэтээҕи тэриллиилэр көмөлөрүнэн элбэх оҕолоох Таппыровтарга чааһынай дьиэ тутан биэрбиттэр. Киэҥ-куоҥ, толору хааччыллыылаах дьиэни амарах санаалаах дьон олунньуттан атырдьах ыйыгар диэри туппуттар. Бу иннинэ Таппыровтар 20 квадратнай миэтэрэ иэннээх хаарбах туруктаах мас дьиэҕэ олорбуттара.
Элбэх оҕолоох Артур Патриотович Чурапчы улууһуттан төрүттээх, 2010 сылтан «Болугур» ТХПК-ҕа ыанньыксытынан үлэлиир эбит. Кини нэһилиэк уонна кэлэктиип уопсастыбаннай олоҕор көхтөөхтүк кыттар, успуорду, чөл олоҕу өрө туппут киһи буолар.
Айсен Николаев саҥа дьиэни-уоту көрдө, оҕолору кытта кэпсэттэ. Оҕолор өрөспүүбүлүкэ Ил Дарханын кытта саҥа дьиэлэммит үөрүүлэрин үллэһиннилэр, оскуолаҕа дьаныардаахтык үөрэнэллэрин, хаһаайыстыбаҕа көмөлөһөллөрүн, бары олус доҕордууларын кэпсээтилэр.
Ил Дархан маннык хабааннаах бырайыактар салҕаныахтарын, өйөбүл баар буолуоҕун бэлиэтээтэ уонна өрөспүүбүлүкэтээҕи тэриллиилэр көхтөөхтүк кыттыһалларыгар ыҥырда.
edersaas.ru
Хаартыска — Мария Васильева.