Амма Болугуругар мас ууһа, норуот маастара Егор Федотов саха төрүт иһитин-хомуоһун оҥоруунан утумнаахтык дьарыктанар. Кини көмүс илиитин иһиттэн тахсыбыт чорооннору, кытыйалары Амма мааны ыалларыгар хайаан даҕаны түбэһэн көрүөххүн сөп.
Василий НИКИФОРОВ, https://edersaas.ru.
Хаһааҥҥыттан уһанар буолбутун ыйыппыппар тохсус кылааска үөрэнэ сылдьан Калашников аптамаатын маһынан кыһан оҥорбутун учууталлара, табаарыстара дьиҥнээхтэн киһи араарбат диэн хайҕаабыттарын ахтан ылла. Егор Иннокентьевич эдэригэр тутууга «болуотунньук-мас ууһа» диэн дуоһунаска үлэлии сылдьыбыт. Олохтоох оскуолаҕа илиинэн оҥоһук куруһуогар оҕолору дьарыктаабыт.
Онтон 1996 сылтан ыла ИП тэринэн үлэлиир. «Норуот маастарын» аатын 2007 сыллаахха биэрбиттэр. «Дмитрий Наумов баһылыгынан олордоҕуна, 1995 сыллаахха улуустааҕы Тунах ыһыахха 200 чороону, кытыйаны оҥорон биэрбитим. Онтум ЛТЗ тыраахтар буолан кэлбитэ», – диэн кэпсиир улахан уус.
«Сыл устатыгар төһөнү оҥороруҥ буолуой?» – диэн ыйытыыга Егор Иннокентьевич: «Сакааһынан уһанабын. Сакаас хайдах киирэриттэн. Ким урууга туттаары, ким үбүлүөйдээх дьоҥҥо бэлэхтээри оҥортороллор. Ый ахсын 3 улахан чороону кытта 20-чэ кыра иһити оҥоруохпун сөп. Куурдуута-хатарыыта бодьуустаах, бириэмэни ылар», – диэн хоруйдаата. Матырыйаалын – хатыҥ маһы кыһын кэрдэн бэлэмнээн кэбиһэр.
Егор Федотов – алта оҕолоох ыал аҕата, үс сиэн эһэтэ. Түөрт уоллааҕыттан үсүһэ Андрей нуучча дуобатыгар гроссмейстер, улуус киининээҕи спорт оскуолатыгар тренердиир. Икки кэрэ кыыстаахтар, кыралара оскуолаҕа үөрэнэр. Ыал ийэтэ Сахаяна Николаевна «Алмазкредитсервис» кэпэрэтиипкэ агенынан үлэлиир, ону таһынан чааһынай маҕаһыын арыммыттарыгар атыылыыр. Федотовтар улахан дьиэ кэргэттэрэ 2014 сыллаахха өрөспүүбүлүкэтээҕи куонкуруска «Тыа сирин бастыҥ ыала» ааты ылан турардаах.
Василий НИКИФОРОВ, https://edersaas.ru.
Мария ВАСИЛЬЕВА (СИА) хаартыскаҕа түһэриитэ.