Маны аах Уопсастыба

Болугур уонна Хатыстыыр уопсастыбанньыктара уопуттарын атастастылар

Бу күннэргэ Амма улууһун Болугур нэһилиэгэр биир бэлиэ үөрүүлээх күн буолан ааста. Амма Болугурун уонна Алдан оройуонун Хатыстыыр нэһилиэгин уопсастыбанньыктара көрсөн, үлэ уопутун атастастылар, бииргэ үлэлээһин тосхолун торумнаатылар.  

Болугурдар «Салама ыйааһынын» сиэрин-туомун толорор буолбуттара хас да сыл буолла.  Быйыл эмиэ этэҥҥэ тымныы кыһыны туораан, самаан сайыны көрсөн, сир-дойду иччитигэр Аан Алахчын хотуҥҥа сүгүрүйэн, ситии саламаны  ыйаатылар.

Бу тэрээһини көҕүлүүр олохтоох Култуура дьиэтин уус-уран салайааччыта Евдокия Платонова маннык сырдатар:

Сарсыардаттан ардах курулаччы түспүтэ. Ол эрээри сиэри-туому толорор кэммитигэр халлаан көнньүөрэн, күн чаҕылыччы тыкпытыттан бар дьон үөрэн, уйгулаах сайыны түстээтибит. Салама ыйааһынын сиэрэ-туома хас сыл аайы бэрт  сэргэхтик, сүрдээх тэрээһиннээхтик ааһар. Быйыл бу тэрээһиммитигэр  Алдан улууһуттан Хатыстыыр нэһилиэгин баһылыга  Дьулустан Сидоров, «Далбар хотун» түмсүү салайааччыта  Акулина Авелова, түмсүү чилиэннэрэАлександра Тарасова, Маргарита Анисимова, Лариса Енохова күндү ыалдьыт буолан сырыттылар. Икки нэһилиэк уопсастыбанньыктара алгыстаах алаадьыны, минньигэс саламааты , кус миинин төбүрүөннээн олорон амсайдыбыт.

Дьоро күн иккис аҥаарыгар Болугур нэһилиэгин Бочуоттаах олохтооҕо, үлэ, тыыл бэтэрээнэ, кадровай булчут, ытык кырдьаҕас  Евдокия Николаева «Тарбаҕым талаана — өбүгэм үгэһэ» диэн кини айар үлэтэ уһуллубут диискэтин сүрэхтэниитэ буолла. Болугур нэһилиэгэр эбэҥки норуотун сыдьааннара төбүрүөннээн олороллор. Бултаан, күндү түүлээх арааһын тигэн оҕолоругар, кэнчээри ыччакка үтүө холобур буолаллар. Иис, оҥоһук арааһын сырдатар быыстапкаҕа кыттыыны ыллылар уран тарбахтаах дьоммут, СӨ норуотун маастардара Степан Устинов, Валентина Стручкова-Сарыада Уус, Клавдия Новикова, Ульяна Михайлова-Маай кыыһа, Егор Федотов. «Кэрэни кэрэхсээ» диэн Болугур нэһилиэгин «Арчылаана» түмсүү салайааччыта Ульяна Иванова, «Чөмчүүк» түмсүү салайааччыта Оксана Ефремова уонна «Далбар Хотун» Хатыстыыр нэһилиэгин тириитин таҥастааһынын технологиятын көрдөрүүтэ, төрүт ииһи сырдатыыта хомуллан үөскээбит  түмсүүтүн салайааччыта Акулина Авелова бэйэлэрин үлэлэрин сырдаттылар. Үлэ хайысхатын кэпсэтиһэр, уопут атастаһар «төгүрүк остуол» бэрт сэргэхтик  ааста. Тэрээһиммитин «Сарыада» фольклорнай бөлөх  салайааччыта Евдокия Платонова, «Сырдык«, «Алгыс» үҥкүү бөлөхтөрүн салайааччыта Анна Удина киэргэттилэр.

Алдан улууһун Хатыстыыр нэһилиэгин уопсастыбаннай түмсүүлэрин кытта биир ситимнээх үлэбитин сайыннаран, сүбэбитин холбоон биир хайысханы тутуһан үлэлэһиэхпит диэн эрэнэбит. Бар дьоммутугар чэгиэн олоҕу, кэрэни кэрэхсии, үтүөнү үксэтэ туралларыгар баҕарабыт.

Елена ПОТОЦКАЯ, «Саха сирэ» хаһыат.

0
0
Telegram @edersaas20