Амма улууһун Болугур сэлиэнньэтигэр балаҕан ыйын 2 күнүгэр 120 сүөһү турар саҥа хотоно үлэҕэ киирдэ. Үүт харайар блоктаах саҥа хотон Саха сирин тыа хаһаайыстыбатын министиэристибэтин көмөтүнэн тутулунна.
Саҥа эбийиэк үлэҕэ киирбитинэн «Болугур» бааһынай хаһаайыстыба кэлэктиибин Амма улууһун баһылыга Николай Архипов уонна Саха сирин Ил Дархана Айсен Николаев эҕэрдэлээтилэр.
— Болугур — ынах сүөһү уонна сылгы ахсаанын элбэтиигэ өрөспүүбүлүкэҕэ инники күҥҥэ сылдьар нэһилиэктэртэн биирдэстэрэ. Төһө даҕаны ыарахаттар баалларын үрдүнэн, манна сүөһү ахсаана элбээн, туруга тупсан иһэр, — диэн Саха сирин баһылыга тыа хаһаайыстыба үлэһиттэрин хайҕаата. Бу үтүө тыллары кытта Ил Дархан Болугур нэһилиэгин баһылыгар “Белорусь” тыраахтары ылар сэртипикээти туттарда.
«Болугур» СХПК салайааччытыгар Михаил Ксенофонтовка тутуунан дьарыктанар “Элма” тэрилтэ дириэктэрэ Юрий Семенов саҥа хотон күлүүһүн туттарда. Саҥа тутуллубут эбийиэк уопсай иэнэ 1500 кв. м. тэҥнэһэр.
— Эргэ хотоммут сэбиэскэй кэмтэн турбута, онон саҥа киэҥ-куоҥ, тупсаҕай оҥоһуулаах хотоҥҥо үлэлииргэ да чэпчэки буолуо! — диэн техник-осеменатор идэлээх Галина Устинова үөрүүтүн үллэстэр.
«Болугур» бааһынай хаһаайыстыба, кырдьык, сылтан сыл иитэр сүөһүтүн ахсааанын элбэтэн иһэр биир бастыҥ тэрилтэ буолар. 2015 сылтан аахтахха, аҥардас ынах сүөһү ахсаана 65 төбөнөн элбээн, билигин 530 төбө буолан турар. Сылгыларын ахсаана 115 төбөнөн элбээн, хаһаайыстыба үөрдэригэр 608 сыспай сиэллээх баар, олортон 320-тэ биэ сылгы.
Ил Дархан уонна Бырабыыталыстыба пресс-сулууспата.
Егор Карпов бэлэмнээтэ, «Саха сирэ» хаһыат, edersaas.ru
Мария Васильева хаартыскалара.