Аҕыс саастарын туола илик оҕолор ыарыйдахтарына бэриллэр “больничнай” төлөнүүтэ уларыйда. Арассыыйа бырабыыталыстыбата бу сыалга анаан биир миллиард кэриҥэ солкуобайы ыытыаҕа. Балаҕан ыйын 1 күнүттэн “больничнай лиис” төлөбүрэ хамнас 100%-гар тэҥнэһиэҕэ.
Билигин “больничнай” төлөнүүтэ үлэ ыстааһыттан тутулуктаах. Эдэр төрөппүттэр ыстаастара кыра буоллаҕына, «больничнай иис» төлөбүрэ хамнастарынааҕар кыра буолар этэ. Онон бу уларыйыы кинилэргэ ордук туһалаах.
РФ бырабыыталыстыбатын бэрэссэдээтэлэ Михаил Мишустин этэринэн, бу саҥа миэрэ үлэни биэрээччилэри таарыйыа суоҕа. “Больничнай” сууматын үрдээһинэ Социальнай страховкалааһын пуондатыттан төлөнүөҕэ. Төрөппүттэр эбии докумуоннары толороллоро ирдэммэт – пуонда бэйэтэ ааҕан-суоттаан баран, төлөбүрү оҥоруохтаах.
Ангелина Васильева, “Саха сирэ” хаһыат, edersaas.ru
Хаартыска: СИА.