Быйыл Кытайтан кэлэр туристарга улахан болҕомто ууруллуоҕа.
еdersaas.ru
Бу туһунан Бырабыыталыстыба бэрэссэдээтэлин солбуйааччы Кирилл Бычков сыл саҥатыгар суруналыыстары кытта көрсүһүүгэ тоһоҕолоон бэлиэтээтэ.
Кэлиҥҥи кэмҥэ Кытай Саха сиригэр улахан интэриэстэммитин бары да көрө, истэ-билэ сылдьабыт. Ыраата барбакка, чысхаан тымныы оройугар, тымныы полюһугар — Өймөкөөҥҥө бэлэсипиэтинэн бара сатаабыт, 60-тан тахса кыраадыс тымныыга өйүмүгэ сөтүөлээбит кытай ыччаттарын үгүс киһи өйдүүр. Ол, биллэн турар, Саха сирин тымныытыгар интэриэс үөскээбитин кытта ыкса сибээстээҕэ чахчы.
Вице-премьер Кирилл Бычков бэлиэтээбитинэн, 2019 сылга өрөспүүбүлүкэҕэ элбэх турист кэлэрин ситиһэр инниттэн инфраструктураны сайыннарыыга улахан болҕомто ууруллуоҕа.
— Туристар билигин ордук Өймөкөөн тымныытын уонна «Өлүөнэ очуостара» Айылҕа пааркатын интэриэһиргииллэр. Бу бөдөҥ туристскай эбийиэктэр аан дойдуга тиийэ аатыраллар. Ол эрээри, манна туристары түһэрэр уонна аһатар инфраструктураны сайыннарыыга, айан суолугар быһаарыыны эрэйэр боппуруос үгүс.
Өссө биир болҕомтону туһаайар өрүтүнэн иһитиннэрэр, рекламалыыр үлэни тэрийии буолар. Ордук Кытай, Корея уонна Япония туристарыгар туһаайан үлэлиэххэ наада. Ол инниттэн интэриниэт ресурстарга туһааннаах үлэ ыытыллара эрэйиллэр. Холобур, Кытайга интэриниэтинэн, социальнай ситимнэринэн Саха сирин туһунан кэпсиир, иһитиннэрэр матырыйааллар наадалар. Урукку курдук туристарга аҥардас анал брюшалары уонна буклеттары эрэ бэлэмнииртэн тэйэн, туроператордары кытта ыкса ситимнээхтик үлэлээһин ирдэнэр. Маны тэҥэ, Кытай туристара Саха сиригэр кэллэхтэринэ бэйэлэрин холкутук сананалларын туһугар кытайдыы араас иһитиннэрэр-биллэрэр сурук-бичик, туристар тылларынан саҥарар араас өҥөнү оҥорор персонал наада, — диэтэ суруналыыстарга вице-премьер Кирилл Бычков.
2019 сылга хаачыстыбалаах туристскай бородууктаҕа болҕомто ордук ууруллуоҕа. Предпринимательство уонна туризм миниистирэ Ирина Высоких бэлиэтииринэн, туризм эйгэтигэр үлэҕэ муниципальнай тэриллиилэргэ анал рейтиннэри олохтуохтара. Онон көрөн улуустарынан сүрүн туристскай маршруттар талыллыахтара. Бу рейтини быһаарыыга омук сириттэн уонна Арассыыйа регионнарыттан сылдьар туристар тус санаалара учуоттаныаҕа. Саха сиригэр туризм салаатын сайыннарыыга туһуламмыт саҥа соруктары туруорар концепция бигэргэниэҕэ. Саха сирин биир кэлим туристскай брендэ оҥоһуллуоҕа. Туризм салаатыгар үлэлэһэр предпринимателлэри үөрэтиигэ, сайыннарыыга, үбүнэн өйүүргэ аналлаах механизмнар олоххо киириэхтэрэ. Туристары аҕалыыга үлэлэһэр “Якутия” туристскай-иһитиннэрэр киин үлэтэ күүһүрдүллүөҕэ. Дьокуускай куорат аэропордугар бу киин туристары көрсөр пууна аһыллыаҕа.
Елена ПОТОЦКАЯ, “Саха сирэ” хаһыат, edersaas.ru
Хаартыска: интэриниэттэн