БОЛҔОЙУҤ! «ҮЙЭЛЭЭХ МАЛ» («ӨБҮГЭМ СИТИМЭ») ХААРТЫСКАНАН, ВИДЕОНАН КУОНКУРУС!

БОЛҔОЙУҤ!   БОЛҔОЙУҤ!  БОЛҔОЙУҤ!

“Саха сирэ” хаһыат уонна edersaas.ru саайт, Емельян Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейа Саха АССР 100 сылынан, 2022 сыл Саха Өрөспүүбүлүкэтигэр – Ийэ, РФ — Арассыыйа норуоттарын култууратын үйэлээх баайын сылларынан эһиэхэ, ааҕааччыларбытыгар,  анаан

“ҮЙЭЛЭЭХ МАЛ”

(«ӨБҮГЭМ СИТИМЭ»)

диэн хаартысканан уонна видеонан куонкуруһу биллэрэбит. Манна биирдиилээн дьон, дьиэ кэргэн (музейдар манна күрэстэспэттэр, музейтан малы-салы уларсан кыттар көҥүллэммэт) кытталлар.

Дьоҥҥутуттан-сэргэҕититтэн эһиэхэ бэриллибит, хаалбыт былыргы (100 уонна онтон элбэх сыл хараллан сытар мал ордук биһирэнэр) иһит-хомуос, мал-сал, киэргэл, таҥас-сап баар буоллаҕына, манна кыттыҥ!

         1.КУОНКУРУС СЫАЛА-СОРУГА:

-Өбүгэ үгэһин, сиэрин-туомун, туттубут малын-салын кэнчээри ыччат билэригэр-көрөрүгэр, харыстаан илдьэ сылдьарыгар, билиитин дириҥэтэригэр ананар.

         2.БАЛАҺЫАННЬАТА:

-Куонкуруска кыттааччыга сааһынан хааччах суох.

          3.ХААРТЫСКАНЫ, ВИДЕОНУ КИЛЛЭРИИ БЭРЭЭДЭГЭ:

-Кыттар малгытын хаартыскаҕа түһэрэн эбэтэр видеоҕа устан ыытаҕыт.

-Хаартысканы эбэтэр видеону куонкурус балаһыанньата “Эдэр саас” саайтка тахсыбыт күнүттэн муус устар 7 күнүгэр диэри ыытаҕыт. Төлөпүөн: 8-914-231 33 97 (батсаап), sard8822@yandex.ru.

          4.СҮРҮН ИРДЭБИЛЛЭР:

-Хаартыска, видео чуолкай буолуохтаах. (Видео сытыары, 1-3 мүн. диэри).

-Кэпсиир, көрдөрөр малгыт-салгыт эһиэхэ кимтэн бэриллэн хаалбытын, хас сыллаах буолуон сөбүн сиһилии быһааран кэпсиигит, суруйаҕыт.

-Куонкуруска кыттааччылар «Үйэлээх мал» («Өбүгэм ситимэ») диэн ыйаҕыт. Батсаабынан 8-914-231-3397 нүөмэргэ, sard8822@yandex.ru электроннай аадырыска ыытаҕыт.

-Кыттааччы аатын, араспаанньатын, улууһун, нэһилиэгин толору суруйар. Төлөпүөнүн нүөмэрин ыйар.

-Хаартыска ахсаана – 1-5 диэри.

-Биир видео 1 мүнүүтэттэн  — 3 мүн.диэри буолуохтаах. Сытыары устаҕыт.

          5.КЫАЙЫЫЛААХТАРЫ БЫҺААРЫЫ УОННА БЭЛИЭТЭЭҺИН:

-Киирбит үлэлэри дьүүллүүр сүбэ көрөр ону таһынан, куоластааһын edersaas.ru саайтынан эмиэ ыытыллар. Куоластааһын муус устар 8-12 күннэригэр буолуоҕа. (Хаартыскалар, видеолар edersaas.ru саайтка тахсыахтара).

-Кыайыылаахтары быһаарыы маннык номинацияларынан быһаарыллыа: 1)Үйэлээх мал (100 уонна онтон элбэх сыл харалла сытар мал), 2)Саха Өрөспүүбүлүкэтин историятын кытта сибээстээх мал, 3)Сэдэх мал. 4)Мин дьиэ кэргэним кэриэс мала (реликвия). Ону таһынан, edersaas.ru саайтка киирэн куоластааһынынан.

Кыайыылаахтар сыаналаах бириистэринэн наҕараадаланыахтара. Биһирэбил бириистэр эмиэ туттарыллыахтара.

-Киирбит матырыйааллар куонкурус кэнниттэн Емельян Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейын саайтыгар тахсыахтара.

-«Үйэлээх мал» («Өбүгэм ситимэ») куонкурус түмүгэ муус устар 14 күнүгэр  «Саха сирэ» хаһыакка, edersaas.ru уонна Емельян Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейын” (http://yakutmuseum.ru/) саайтарыгар тахсыаҕа.

СПОНСОРДАР:

“Саха сирэ” хаһыат, “Сахамедиа” РИИХ, Ем.Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейа, “Айар” кинигэ кыһата, “Чороон XXI үйэ” ХЭУо, «Уус Экспо» маҕаһыын, СӨ Култуура уонна устуоруйа эбийиэктэрин харыстыыр департамент, ИП «Р.Е.Федотов», Дьокуускай куорат дьаһалтата.

Хаартыскалар Ем.Ярославскай аатынан музейтан