Атырдьах ыйын 27 күнүттэн балаҕан ыйын 4 күнүгэр диэри Кемерово куоракка буоксаҕа эр дьоҥҥо Арассыыйа чөмпүйэнээтэ ыытыллыаҕа. Дойду бастыҥ боксердара быйыл Белградка буолар аан дойду чөмпүйэнээтигэр кыттар сүүмэрдэммит хамаандаҕа киирэр уонна бастыыр иһин илин-кэлин түсүһүөхтэрэ.
Чөмпүйэнээккэ Арассыыйа 60 эрэгийиэниттэн 400 спортсмен кыттара күүтүллэр. Күрэхтэһии Буокса норуоттар икки ардыларынааҕы ассоциациятын (AIBA) саҥа быраабылатыгар олоҕуран, барыта 13 ыйааһынынан ыытыллыаҕа.
Манна Саха сирин боксердара кытталлара күүтүллэр — Василий Егоров, Евгений Мартынов, Талбан Егоров, Борис Сидоров, Михаил Прокопьев, Айтал Дьяконов уо.д.а.
Боксердарбыт сайын СӨ Успуорка бэлэмнэнии киинин Аллараа Бэстээххэ баар баазатыгар бэлэмнэммиттэрэ, итиэннэ Краснодарга түмүктүүр хомуурга сылдьыбыттара.
Хаартыска — sportyakutia.ru