Бүгүн, алтынньы 18 күнүгэр, Кыайыы болуоссатыгар Арассыыйа буоксаҕа федерациятын, СӨ Спордун министиэристибэтин, СӨ буоксатын федерациятын бэрэстэбиитэллэрэ, Арассыыйа чөмпүйэнээтин кыттыылаахтара уонна судьуйалара сибэкки дьөрбөтүн уурдулар.
Тэрээһиҥҥэ Арассыыйа буоксаҕа федерациятын генеральнай сэкирэтээрэ Умар Кремлев, СӨ спордун миниистирин бастакы солбуйааччы Семен Чердонов, СӨ буоксаҕа федерациятын бэрэссэдээтэлэ Петр Алексеев, Арассыыйа сүүмэрдэммит хамаандатын сүрүн тириэньэрэ Эдуард Кравцов уонна Олимпиада кыайыылаахтара Рахим Чахкиев, Гайдарбек Гайдарбеков, Шамиль Сабиров уонна спортсменнар, судьуйалар, буокса бэтэрээннэрэ кыттыыны ыллылар. Кинилэр Аҕа дойду Улуу сэриитигэр өлбүт буойуннары санаан, саҥата суох турдулар. Умар Кремлев сэрии кыттыылаахтарыгар махтанан: «Ыччат өбүгэлэрбит хорсун быһыыларын хаһан да умнуо суохтаах», — диэтэ.Саха Өрөспүүбүлүкэтин буоксаҕа федерациятын бэрэссэдээтэлэ Петр Алексеев тэрээһин кыттыылаахтарыгар махтал тылын тиэртэ. «Спорт барыбытын сомоҕолуур, хаһан да сэрии буолбатын», — диэн тэрээһини түмүктээтэ.
Николай Попов, «Саха сирэ» хаһыат, edersaas.ru
