Олимпиец, Саха сирин бастыҥ боксера Василий Егоров Арассыыйа икки төгүллээх чөмпүйүөнэ буолла. Саха сиригэр кэлээт даҕаны хайдах киирсибитин туһунан пресс-конференция тэрийэн суруналыыстары, бокса бэтэрээннэрин кытары көрсөн маннык кэпсээтэ:
- Мин Риоҕа ыытыллыбыт олимпиадаҕа хотторуум кэнниттэн ый кэриҥэ сынньанным, сэниэ ыллым. Онтон тренерим күүскэ дьарыктаан, кыаҕым муҥутуур чыпчаалын Арассыыйа чөмпүйэнээтигэр сөп түбэһиннэрэн кыайыыны ситистим. Бу ситиһиим Саха сиригэр бокса сайдыбыта 60 сылыгар ананар. Киирсии миигин элбэххэ үөрэттэ. Холобур, урукку өттүгэр утары саайыыттан олус куттанар, саллар этим. Финалга Бурятияттан сылдьар биллэр боксердуун Белик Галановтыын киирсиибитин тэлэбиисэринэн быһа биэриигэ хааһым үрдүнэн хайа барбытын, хаанын сото-сото киирсбиппин бары көрбүккүт. Тохтоон хаалбакка, салгыы киирсэн кыайбытым. Билигин бу уопуппун атын даҕаны күрэхтэһиилэргэ туһаныам. Санатан эттэххэ, ааспыт сылга Владивостокка ыытыллыбыт Арассыыйа чөмпүйүнээтигэр эмиэ финалга тахсан хотторбутум. Быйыл сөпкө дьарыктанан, күүһүм оруобуна бу кэмҥэ муҥутуур чыпчаалыгар тиийбитэ уонна эдэрим, эрчимим улахан оруолу оонньоон эрэллээхтик кыайдым.
Пресс-конференция бүтүүтүгэр Спорт саҥа миниистирэ Георгий Балакшин министиэристибэ аатыттан Василий Егоровка 200 тыһ. солк. уонна кини тренерэ Артур Пахомовка 100 тыһ. солк. суумалаах сэртэпикээттэри туттарда.
Станислав ИОВЛЕВ, edersaas.ru
+1
+1
+1
+1
+1
+1
+1