Атырдьах ыйын 30 күнүттэн балаҕан ыйын 5 күнүгэр диэри Ижевск куоракка буоксаҕа Арассыыйа Куубага ыытыллынна. Манна Саха сирин алта боксера ситиһиилээхтик кытынна.
Күрэхтэһиигэ аҕыс федеральнай уокуруктан 200 спортсмен кытынна. Турнир бирииһин пуондата — 15 мөлүйүөн солкуобай.
РФ успуордун үтүөлээх маастара Василий Егоров 52 киилэ ыйааһыҥҥа Киин федеральнай уокурук аатыттан күрэхтэстэ. Кини бастакы киирсиигэ Соҕурууҥҥу уокуруктан Ахмед Закировы 3:2 ахсааҥҥа, иккискэ Сибииртэн Павел Гунченокны 5:0 ахсааҥҥа кыайталаабыта.
Саха сирин атын боксердарын хамаандалара, хомойуох иһин, финалга тахсыбатылар. Ол да буоллар, уолаттар чаҕылхай киирсиилэри көрдөрдүлэр. Москваттан 49 киилэҕэ Борис Сидоров үс кыайыылаах уонна Соҕурууҥҥу федеральнай уокуруктан 49 киилэҕэ Михаил Прокопьев, Уһук Илиҥҥи федеральнай уокуруктан 49 киилэҕэ Михаил Варламов, Москваттан 75 киилэҕэ Назар Андреев ситиһиилээхтик кытыннылар.
Финалга Киин федеральнай уонна Приволжскай уокуруктар тахсыбыттара. Манна Василий Арассыыйа чөмпүйэнээттэрин икки төгүллээх призерун, норуоттар икки ардыларынааҕы кылаастаах успуорт маастарын Иван Абрамовы кытта көрүстэ. Киирсии үс эргиирэ Василий салайыытынан ааста. Онон, судьуйалар быһаарыыларынан, кыайыыны 5:0 ахсааҥҥа Василий Егоров сурунна.
Хамаанданан күрэхтэһии буолан, Киин федеральнай уокурук 4:6 ахсааҥҥа Приволжскайтан хотторон иккис миэстэ буолла. Онон Василийбыт биир даҕаны хотторуута суох Арассыыйа Куубагын иккис миэстэлээҕэ буолла.
edersaas.ru
Сүрүн хаартыска — news.ykt.ru
Матырыйаалга батсаап хаартыскалара туһанылыннылар.