Мэҥэ Хаҥалас боксуордара бу тухары анал саалата суох, көрүдүөргэ эрчиллэн, буһа-хата дьарыктанан, улахан ириингэлэргэ ааттарын ааттаппыттара.
‒ Бу кыракый эргэ «саалабыт» көрдөххө боростуой курдук эрээри, кини истиэнэтиттэн элбэх боксуор таҕыста. Василий Егоров, Шамиль Наурузов, Айтал Дьяконов, Михаил Скрыбыкин, Женя Мартынов курдук чөмпүйүөннэр бастакы хардыыларын мантан саҕалаабыттара, ‒ диэн СӨ үтүөлээх тириэньэрэ, СӨ физическэй култуураҕа туйгуна, улуус буоксаҕа ыстаарсай тириэньэрэ Василий Шестаков кэпсиир. Күн-бүгүн буокса көрүҥүнэн улууска 150 оҕо Майаҕа, Аллараа Бэстээххэ, Төхтүргэ баазаланан дьарыктанар. ‒ Саалабыт билигин тубуста, бары ирдэбилгэ эппиэттиир буолла. Онон биһиги оҕолорбут өссө дьаныардаахтык дьарыктанан кыайыылары аҕала туруохтаахтар диэн эрэллээхпит, ‒ диэтэ Василий Юрьевич.
Саҥа саала үөрүүлээх арыллыыта сэтинньи 8 күнүгэр буолла. Бу саалаттан хатан тимир курдук хатарыллан бастыҥ ыччаттар иитиллэн тахсалларыгар саха дьонун сиэринэн аал уоту аһатан айах туттулар. Ытык арчыһыт Петр Тихонов алгыстаан амалыйда.
Саала аанын аһар аалай лиэнтэни быһыыга улуус баһылыга Николай Старостин, СӨ Ил Түмэн Судаарыстыбаннай мунньаҕын дьокутаата Юрий Баишев, «Манчаары» успуорт чэбдигирдэр комплексын дириэктэрэ Петр Илларионов, «Стройкомплект-сервис» тутуу тэрилтэтин дириэктэрэ Руслан Трофимов, улуус успуорка уонна физическэй култуураҕа управлениетын начаалынньыга Александр Брызгалов ыҥырылыннылар. Руслан Анатольевич символическай күлүүһү Петр Илларионовка туттарда.
Буокса саалатын арыллыытын түгэнигэр буоксаҕа Арассыыйа успуордун үтүөлээх маастара Василий Егоров албан аатын ааттыыр үөрүүлээх тэрээһин буолла. Киирии тылы улуус баһылыга Николай Старостин эттэ:
‒ 2015 сыллахха «Манчаары» успуорт комплекс дириэктэрин Петр Илларионовы кытта буоксаҕа анал саала тутуллуутун туһунан кэпсэтии ыытыллыбыта. Онуоха эбии комплекска сыста турар тутууну ыытыы ханнык да бырагырамааҕа киирсибэтин үрдүнэн, ол саҕана ыччаттарбытыгар анаан сүүрүү манеһын тута сылдьар «Стройкомлект-сервис» тутуу тэрилтэтин салайааччыта Руслан Трофимов утары баран, буокса саалатын күн-бүгүн хаачыстыбалаахтык оҥорон, күлүүһүн туттарда. Биһиги киэн туттар Василий Егоровпыт курдук ыччаттар бу саалаттан кынат анньынан тахса турдуннар диэн этэбин. Василий Михайлович аны иккис олимпийскай эргимтэҕэ киирсэн, 2020 сылга Токиоҕа ыытыллыахтаах оонньууга кыттар чиэскэ тиксиэҕэр баҕарабыт, ‒ диэн туран Василийга үптээх анал сэртипикээти таһынан ыраас хааннаах сүүрүк сылгы хаһаайына буоларын туоһулуур сэртипикээти туттарда.
Бэйэлэрин истиҥ эҕэрдэлэрин СӨ Ил Түмэн дьокутаата Юрий Баишев, улуус нэһилиэктэрин баһылыктарын ааттарыттан «Хара нэһилиэгэ» МТ баһылыга Дария Назарова, улуус тэрилтэлэрин начаалынньыктара, успуорт бэтэрээннэрэ эҕэрдэлээтилэр. Юрий Петрович СӨ успуорка уонна физическэй култуураҕа министиэристибэтин грамотатын Василий Егоровка, Махтал суруктары төрдүттэн тутуу управлениетын сүрүннүүр исписэлииһигэр Гаврил Васильевка, успуорт комплекс үлэһиттэригэр Анастасия Никанороваҕа уонна Февронья Ивановаҕа туттартаата.
Бар дьонугар Василий Егоров харда тылын эттэ.
‒ Мин 2006 сыллаахтан буоксанан дьарыктаммытым. Буокса эргэ саалатыгар Хараттан күннэтэ үс биэрэстэни хааман, кыһын 50 кыраадыс тымныыга даҕаны киирэн утумнаахтык дьарыктанарбыт. Бастаан уонча буолан кэлэр буоллахпытына, кэнники икки, үс буолан дьарыктанар буолбуппут. Биллэн турар, күүстээх дьарык кэнниттэн сууммакка-тарааммакка дьиэлиир этибит. Төһө да судургу усулуобуйалаах буоллар, элбэҕи биэрбит эргэ саалабытыгар махталым муҥура суох. Билигин буоксаҕа анаммыт саҥа саала бары ирдэбилгэ эппиэттиир, онон оҕолортон өссө ордук ситиһиилэри күүтэбит. Буокса сайдарын туһугар болҕомтону уурар улууспут баһылыгар Николай Старостиҥҥа, бастыҥтан бастыҥ тириэньэрдэргэ Василий Шестаковка, Ариан Монастыревка, успуорт оскуолатын дириэктэригэр Петр Илларионовка, Хара нэһилиэгин баһылыгар Дария Назароваҕа, Хорообут нэһилиэгин баһылыгар Прокопий Плотниковка өрүү аттыбар баар буолан өйүүллэригэр махталбын тиэрдэбин, ‒ диэтэ уонна буокса саалатын сайдыытыгар диэн тус бэйэтин аатыттан 20 тыһыынча солкуобай уу харчыны туттарда.
Василий Егоров үрдүк ситиһиитин чиэстээһин кэнниттэн спортсмен оҕолорго маастар-кылаас көрдөрдө, уолаттардыын аһаҕастык кэпсэттэ.
‒ Улахан таһымнаах спортсмен кэлэн биһигини кытта кэпсэппитэ, бэйэтин уопутун атастаспыта олус үчүгэй. Элбэҕи биллибит-көрдүбүт. Кини курдук сайдан иһиэхпит, үрдүк чыпчааллары дабайыахпыт диэн эрэнэбит, ‒ диэн өрөспүүбүлүкэ хас да төгүллээх чөмпүйүөнэ, ахсынньы ыйга Санкт-Петербурга Россия кубогар өрөспүүбүлүкэ чиэһин көмүскүү барыахтаах, Василий Шестаков иитиллээччитэ Евгений Мартынов санаатын үллэһиннэ.
Виктория Белолюбская,
ulus.media саайтан.