Уопсастыба

Бойобуой тиэхиньикэ аттыгар хаартыскаҕа түһээри уочарат улахана

Бүгүн Орджоникидзе болуоссатыгар байыаннай тиэхиньикэ быыстапкатын тула хаһааҥҥытааҕар да элбэх киһи муһунна.

Дьон оҕолорун уонна сиэннэрин кытта кэлбиттэр. ДОСААФ үлэһиттэрэ хаартыскаҕа уонна видеоҕа түһэргэ көҥүл биэрбит буолан, тиэхиньикэ аайы — уочарат.

ДОСААФ эригийиэннээҕи салаатын бэрэссэдээтэлэ Сергей Соболев тэрээһин туһунан бу курдук кэпсээтэ:

— Орджоникидзе болуоссатыгар байыаннай тиэхиньикэ быыстапкатын туруорар буолбуппут 10 сыл буолла. Бу ДОСААФка, аныгылыы эттэххэ, «ретротехника» диэн Бойобуой Албан аат түмэл биир салаатынан буолар. Ыам ыйын 7 күнүттэн 9 күнүгэр диэри  сыл аайы бойобуой тиэхиньикэни таһырдьа  анаан туруоран «Аһаҕас аан күннэрин» ыытабыт.  Ыам ыйын  8 күнүгэр үгэс быһыытынан Орджоникидзе болуоссатыгар кэлэн дьоҥҥо көрдөрөбүт. Бүгүн 10 бойобуой тиэхиньикэни —  ГАЗ 57-тэн 40-наах БТР-га тиийэ аҕаллыбыт. Ол эбэтэр, байыаннай кэм саҕанааҕы массыынаттан бүгүҥҥү  КамАЗ-ка тиийэ. Икки сыл устата дьон дьиэҕэ хаайтаран олорбут буолан, болуоссат иһэ бүгүн дьонунан туолла. Онон  куорат олохтоохторо уонна ыалдьыттара дуоһуйа сынньаналларыгар биһиги бойобуой тиэхиньикэни кытта улахан дьоннуун, оҕолуун чугастан көрөллөрүгэр хаартыскаҕа босхо түһүүнү көҥүллээтибит.

Сунтаар олохтооҕо Яков Шарапов киин куоракка «Өлбөт үйэлээх полк” аахсыйаҕа сыл аайы кытта кэлэр эбит. Кини ол туһунан бу курдук кэпсээтэ:

Ийэм аҕата Павел Васильевич Мурукучаев 1930 сыллаахха Дьокуускайга байыаннай национальнай оскуоланы от ыйыгар бүтэрбит. 1941 сыллаахха балаҕан ыйын 5 күнүгэр сэриигэ ыҥырыллан барбыт. Бу байыаннай тиэхиньикэлэр аттыларыгар анаан хаартыскаҕа түһээри кэллим. Коронавирус сыстыганнаах дьаҥа туруон иннинэ 4 сыл тухары кэлэн «Өлбөт үйэлээх полк» хаамыытыгар кыттар этим.  Онтон икки сыл тохтоон баран, быйыл эмиэ эһэбин кэриэстээн бэрт ыраахтан анаан кэллим.

Куорат олохтоохторо Шариннар дьиэ кэргэттэрэ бойобуой тиэхиньикэ быыстапкатыгар хаартыскаҕа түһээри ох курдук оҥостон кэлбиттэр. Бу туһунан Василена Шарина санаатын маннык үллэһиннэ:

Быыстапканы бэҕэһээҥҥиттэн ыла маныыбыт. Батсаап ситимиттэн билэн, анаан-минээн көрө кэллибит. Билигин оҕолорум  ону-маны билэ-көрө сатыыр саастара. Онон Улуу Кыайыы күнүгэр  биһиги хос эһэлэрбит хайдах тиэхиньикэҕэ олорон сэриилэспиттэрин көрдөрө-билиһиннэрэ аҕаллым.  Наһаа үчүгэй быыстапканы тэрийбиттэр.

Киинэҕэ уһулла сылдьар курдук байыаннай таҥастаах уолаттарга чугаһаан кэпсэттим:

Константин Иванов уонна Ибрагим Долаков диэммит. ДОСААФ иһинэн үлэлиир устуоруйа кулуубугар үлэлиибит. Байыаннай кэми санатан, анаан таҥнан кэллибит. «Бэртээхэй тэрээһини тэрийбиккит»  диэн дьон  кэлэн махтаммыттарыгар үөрэн турабыт.

7 саастаах Дьокуускай куорат 27 №-дээх оскуолатын 1-кы кылааһын үөрэнээччитэ Семен аҕатын Андрей Слепцову, ийэтин Варя Аманатованы кытта байыаннай тиэхиньикэни көрө-истэ кэлбиттэр.

Уолчаан ийэтэ СӨ үтүөлээх артыыһа Варя Аманатова кырачаан киһи убайынаан ыам ыйын 9 күнүн олус сөбүлүүллэрин бэлиэтиир:

— Семен бу күн  12 саастаах убайынаан хайаан да байыаннай пуормаларын кэтэллэр. Аҕалара муора флотугар сулууспалаабытын өрүү кэпсиир, уолаттарын дьарыктыыр буолан, аармыйа олоҕор ураты сыһыаннаахтар. Онон бүгүн уолбут эрдэ туран, тэринэн байыаннай тиэхиньикэни көрө-истэ, бэйэтинэн тутан-хабан көрө сылдьар.

31-с оскуола үөрэнээччитэ Ольга Дьячковская быраатын, балтын уонна ийэтин кытта эмиэ анаан кэлбиттэрин туһунан кэпсээтэ:

— Биһиги бары байыаннай көстүүмнээхпит. Ыам ыйын 9 күнүгэр таҥнан хаартыскаҕа түһээччибит. Бүгүн байыаннай тиэхиньикэлэри көрөн үөрдүбүт.

.. Ити курдук дьон байыаннай тиэхиньикэ быыстапкатын илэ көрөн-истэн, олус астынна.

Елена ПОТОЦКАЯ, “Саха сирэ” хаһыат, edersaas.ru

Ааптар хаартыскаҕа түһэриитэ уонна видеҕа устуута.

2
0
Telegram @edersaas20