«Блокада кинигэтин» ыччаттар ырыттылар

Ааптар: 
Бөлөххө киир:

Дьокуускайга В.Г.Белинскэй аатынан бибилэтиэкэҕэ Ленинград блокадатын 75, суруйааччы Даниил Гранин үбүлүөйдээх 100 сааһыгар анаан «Блокада кинигэтэ» диэн литературнай аахсыйа буолла.

edersaas.ru


Суруйааччы айар үлэтигэр, кини Ленинград куораты босхолооһуҥҥа кыттыбыт буолан, блокада туһунан суруйуута биир уһулуччу айымньынан буолар. Даниил Гранин бастаан утаа Белоруссия суруйааччыта Алесь Адамович Ленинград блокадатын туһунан суруйууга этии киллэрбитигэр аккастана сылдьыбыт. Онтон табаарыһа блокада эрэйин бэйэтинэн билбит дьахтары кытта кэпсэтэргэ ыҥырбытыгар барсан баран, «бу туһунан кинигэ хайаан да суруллуохтаах эбит» диэн санааҕа кэлбит. Онон 900 күн устата барбыт Ленинград блокадатын туһунан 200 киһи ахтыытыттан хомуллубут кинигэ билигин сэрии диэни билбэтэх ыччаттарга патриотизмы саҕар биир баар суох күндү кинигэнэн буолар.

Белинскэй бибилэтиэкэтигэр ыытыллыбыт Литературнай аахсыйаҕа киин куорат орто анал үөрэх кыһаларыттан уонна араас оскуолалартан мустубут оҕолор Ленинград блокадатын кыттыылааҕа Лилия Мустафинаны кытта көрүстүлэр. Оччолорго Лилия Андреевна 4,5 эрэ саастаах эрээри, сэрии ыар сылларын умнубаттык өйдөөн хаалбыт.

—  Дьон кыайыыга эрэллээх, тыыннаах хаалар туһугар турууласпыттара. Бу маннык ыар сэрии хаһан да хатыламматын туһугар эһиги, ыччаттар, төрөөбүт дойдугутун сайыннарар, барҕардар санаалаах олоххо үктэниэххитин наада, — диэн бэлиэтээтэ блокада кыттыылааҕа Лилия Мустафина.

Биллэн турар, киһи дууһатын таарыйар маннык тэрээһиннэри ыччакка анаан ыытан, сэрии ыар сылларын умнубаттарын туһугар үлэлэһэбит. Биһиги көлүөнэни сэбиэскэй кэмҥэ Аҕа дойду Улуу сэриитин  кыттыылаахтарыгар, тыыл уонна үлэ бэтэрээннэригэр сүгүрүйэргэ, ытыктабыллаахтык сыһыаннаһарга үөрэтэн улаатыннарбыттара. Онон көлүөнэни көлүөнэ солбуйсан, Ленинград блокадатын, дойдубут историятын умнубаттарыгар, маннык олох хаһан да хатылламматын туһугар өйдөбүлгэ ыччаттарбытын иитиэхтээхпит, — диэн санаатын тиэртэ бибилэтиэкэр Екатерина Попова.

Литературнай аахсыйа кыттыылаахтара бу күн «Блокада кинигэтин» ис хоһоонун ырыттылар.  «Сылаас дьиэ» диэн бибилэтиэкэ иһинэн үлэлиир тыйаатыр устуудьуйата Л.Никольская уонна О. Шестинскай «Мин өлүөхпүн баҕарбаппын…» айымньыларыттан быһа тардан көрдөрдүлэр.

Уу транспорын институтун курсаннара ис сүрэхтэриттэн кинигэттэн быһа тардыылары аахпыттара үгүс киһини долгутта.

Онон тэрийээччилэр да, литературнай аахсыйа кыттыылаахтара да, киһи дууһатын маннык таарыйар тэрээһиннэр олус наадалар диэн санаалаах тарҕастылар.

Елена ПОТОЦКАЯ, «Саха сирэ» хаһыат, edersaas.ru

Екатерина Попова хаартыскаларга түһэриитэ.

+1
0
+1
0
+1
0
+1
0
+1
0
+1
0
+1
0