Суруналыыс Владислав Коротов уонна блогер Алексей Басылаев бэйэлэрин баҕаларынан Мииринэйгэ баран, саахал тахсыбыт сирин көрөн-истэн, уу боруобатын ылан кэллилэр.
Кинилэри “АЛРОСА” үлэһиттэрэ бэйэлэрэ ыҥырбыттара, онон тугу көрүөхтэрин баҕарбыттарын барытын көрдөрдүлэр. Сырыы түмүгүнэн, уу боруобатын ылан, Москваҕа тутулуга суох экспертизаҕа чинчийиигэ ыыппыттар. Түмүгэ нэдиэлэ курдугунан кэлиэхтээх.
Билигин дьон тутулуга суох лаборатория чинчийиитин түмүгүн кэтэһэр. Элбэх киһи долгуйар. Онон блогердар айаннарыгар көмөлөһөн, үп-харчы хомуллубут.
Кинилэр Экология министиэристибэтэ бырамыысыланнас тэрилтэлэрин быһаччы хонтуруоллуур боломуочуйата суоҕа, аҕыйах үлэһиттээҕэ кыһалҕаны үөскэтэр диэн этэллэр. Онон алмааһы хостооһун технологията дьэҥкир, дьоҥҥо өйдөнүмтүө буолуохтаах, министиэристибэ, уопсастыбаннай экологтар, түмсүүлэр эмиэ хонтуруоллуулларын ситиһиэхтээхпит диэн блогердар этэллэр.
Кинилэр саахал тахсыбыт даамбатыгар уонна минераллаах уу харайыллар “хвостохранилищеҕа” сылдьан уу боруобатын ылбыттар.
Санатар буоллахха, элбэх ардах түһэн, атырдьах ыйын 17 күнүгэр Иирэлээххэ саахал тахсыбыта. Экология министиэристибэтэ Бүлүү өрүһү чинчийэргэ Кэлим экологическай-биологическай эспэдииссийэни тэрийэргэ быһаарыныы ылыммыта.
Кирдээх уу билигин Өлүөнэҕэ түһэн, өрүс хаҥас үөһүнэн устар. Ол спутник түһэрбит хаартыскатыгар үчүгэйдик көстөр. Кэбээйи уонна Эдьигээн улуустарыгар экологтар балаһыанньаны кэтээн көрөллөр.
Ангелина Васильева, «Саха сирэ» хаһыат, edersaas.ru