Сунтаар, Ньурба улуустарыгар ойуур баһаардара тураннар, олохтоохтор утуйар ууларын да умнан, улахан уоту кытары охсуһаллар, онон нэһилиэнньэлээх пууннарга киллэрбэтилэр. Эр дьон бары баһаары умуруорууга үлэлииллэр, дьахталлар ас астаан, кинилэргэ тиэрдэллэр. Саҥа көҕөрбүт тыабыт барахсан умайа турара, дьиэлэргэ чугаһаабыт, ойууру үрдүнэн күүдэпчилэнэр баһаары түһэрбит хаартыскалара үгүс дьону аймаатылар.
Онон өрөспүүбүлүкэ дьоно бу иэдээнтэн туора турбакка, көмөлөһөр илиилэрин ууналлар. Блогер, кондитер Мария Столярчик ыҥырыы таһааран, хас да блогер кыттыһан, харчы хомуйуутун саҕалаан, аһы-үөлү, наадалаах тэриллэри ылан, Сунтаар, Ньурба улуустарыгар баһаары утары охсуһар дьоҥҥо ыыттылар.
Ол курдук, бастакы күн 70,5 тыһыынча солкуобай хомулла охсон, улуустарга ыыппыттарыгар, волонтер кыргыттар аһы-үөлү атыылаһан, массыынанан илдьэ биэрдилэр.
Иккис күнүгэр 115 тыһыынча солкуобайга 17 уоту умуруорар, сүгүллэр тэрили, 24 чох фильтрдаах респиратордары, 10 лаппаахыны, 7 бэнсиин эрбиитин, о.д.а. наадалаах тэриллэри ылан ыыттылар. Манна Сунтаар, Ньурба таксистарыгар махтаналлар. Билиҥҥи туругунан, барыта 325 тыһыынча солкуобай хомулунна. Ордубут сууманы волонтердарга ыыттылар. Аахсыйаҕа блогер кыргыттар Тина Куприянова, Эльза Третьякова, Василика Винокурова, Ксения Иванова, Ольга Птицына кыттыстылар.
Мария Столярчик, урбаанньыт, блогер:
— Өрөспүүбүлүкэҕэ үүммүт тыҥааһыннаах түгэннэртэн утуйар уум да уу буолумаары гынна. Төһөлөөх алаас, тыа, ходуһа уокка былдьанан, дьон сүөһүтүн да иитэр кыахтара суоҕа буолуой? Төһөлөөх киһи баһаар буруотуттан доруобуйаларын сүтэриэхтэрэй? Дьон-сэргэ дьиэлэрин-уоттарын харабыллаан, түүннэри-күнүстэри утуйбакка, оҕолуун-дьахтардыын ойуур уотун умулларарга бары кыахтарын уурарга күһэллибиттэр.
Судаарыстыба ону өйдүө, дьону кыһалҕаҕа хаалларыа суоҕа диэн эрэнэбит. Ол эрээри бу дьоҥҥо биһиги хас биирдии бэйэбит сибилигин көмө, тирэх буолар кыахтаахпыт. Бу өрөспүүбүлүкэни биир гына тэнийэн эрэр ойуур баһаара тустаах улууска эрэ олорор дьон кыһалҕата буолбатах, бу – барыбыт кыһалҕабыт. Онон барыгытын маннык иэдээҥҥэ бииргэ буолуохха, бэйэ-бэйэбитин өйөһүөххэ, биир сомоҕо буоларбытын көрдөрүөххэ диэн ыҥырабын. Бары кыттыспыт дьоҥҥо махталбытын тиэрдэбит. Волонтер кыргыттарынан киэн туттабын! Манан харчы хомуйуутун тохтотобут.
Ангелина Васильева, “Саха сирэ” хаһыат, edersaas.ru
Хаартыска: СИА, ykt.ru