Арассыыйаҕа биллэр Ньурба блогера Олесь Петрович Саха сирин киэҥ кыраайын, кэрэхсэнэр сирдэрин, норуотун устуоруйатын, төрүт үгэстэрин, номохторун сэһэргиир. Ютуб ханаалыгар 170 тыһыынча сэҥээрээччилээх.
edersaas.ru, Татьяна Потапова
Бу күннэргэ блогер Үөһээ Бүлүү сиригэр-уотугар кэлэн үлэлээн, көрөөччүлэригэр саҥа, сонун видеолары уһулан барда.
Кэнтиккэ тимири уһаарар Чап уустара үгүс киһи болҕомтотун тардаллар, улууспут кыраайын дириҥэтэн үөрэтиигэ ыччат дьону угуйаллар. Ол да иһин, Олесь Петрович эмиэ маҥнай болҕомтотун кинилэр олорон ааспыт олохторун, дьарыктарын сырдатыыга туһаайда. Кинини бу сырыытыгар олохтоох бибилэтиэкэрэ Мария Ущницкая «биллиилээх, олорон ааспыт модун тимири уһаарар уустардаахпыт, өбүгэлэрин дьарыктарын утумнуур, кэнчээри ыччаты уһуйар сыдьааннардаахпыт, кинилэр тустарынан аан дойду барыта билиэн баҕарабыт» диэн ыҥыран, устарыгар көрдөспүтэ. Көҕүлээччи блогеры уонна кини кэргэнин, доҕотторун икки күн устата арыаллаан, Тоҥуоҕа, былыр Күссүү диэн сиргэ тимири уһаарбыт сирдэринэн кэрийтэрэ сылдьан уһултарда. Олесь Петрович Кэнтик Чап уустарын уонна баһылык Валерий Валерьевиһы кытта көрсөн, ирэ-хоро кэпсэттэ, Кэнтик нэһилиэгэ үүнэ-сайда турарыттан олус диэн сөҕөн барда.
Салгыы блогер айылҕа биир сэдэх, дьикти кэрэ көстүүлээх, сайыннары ирбэт, кыһыннары тоҥмот үрэхтээх, Муус Аппа сирин-уотун уһулардыы, айан суолун тутуста.
Татьяна Потапова, Үөһээ Бүлүү улууһун дьаһалтатын пресс-сулууспата