Сүрүн Тырааныспар

«Бүлүү» трассаҕа киһи өлүүлээх суол быһылаана буолла

Бэҕэһээ, тохсунньу 9 күнүгэр, «Бүлүү» трассаҕа 16 киһи эчэйиилээх, биир киһи өлүүлээх суол быһылааннара буоллулар. Ол иһигэр 5 оҕо эчэйиини ылла диэн СӨ ИДьМ пресс-сулууспата иһитиннэрэр.

Барыллаан иһитиннэриинэн, бэҕэһээ 15:20 чааска «Бүлүү» трасса 130-с килэмиэтиригэр «Тойота Королла Филдер» массыына суоппара эргиигэ сатаан ыыппакка утары айанныыр суолга тахсан биэрэн, «Тойота Ипсум» массыыналыын харсыспыт. Ол түмүгэр «Тойота Ипсум» массыына суоппара — 1971 с.т. эр киһи балыыһаҕа тиэрдиллэн иһэн тыына быстыбыт. «Филдер» суоппара пассажира суох айаннаан испит. Итиэннэ «Ипсумҥа» олорсон испит алта пассажиры балыыһаҕа илдьибиттэр, ол иһигэр биир сааһын ситэ илик оҕо баар.

Аны бу күн киэһэ 18 чаас саҕана эмиэ «Бүлүү» трасса 150-с килэмиэтиригэр суол быһылаана таҕыста. Барыллаан иһитиннэриинэн, «Субару Импреза» массыына суоппара утары айанныыр суолга тахсан, «Тойота Хайс» микро-оптуобуска кэлэн түспүт. Ол түмүгэр микро-оптуобус биэс уонна «Субару» түөрт пассажирдара, ол иһигэр түөрт оҕо эчэйиини ылбыттар. Кинилэри балыыһаҕа тиэрдибиттэр. Быһылаан хайдах буолбута чинчийиллэр.

0
0
Telegram @edersaas20