Өрөспүүбүлүкэтээҕи 3 нүөмэрдээх килиниичэскэй балыыһа Эмтиир-реабилитациялыыр киинин таһыгар 57 хатыҥ маһы олортулар.
edersaas.ru
Аҕа дойду Улуу сэриитин хонуутугар охтубут буойуннар ааттарын үйэтитэр “Өйдөбүнньүк саада” аан дойдутааҕы аахсыйа чэрчитинэн ыытыллыбыт мас олордуутугар Наталия Гавриловна Дмитриева сэбиэдиссэйдээх эмтиир-диагностикалыыр киин кэлэктиибэ кытынна. Мас олордуутун бэтэрээннэр көҕүлээбиттэрин быйыл 90 сыллаах үбүлүөйүөн бэлиэтиир кэлэктиип салалтата тута өйөөбүтэ.
Субуотунньукка бэтэрээннэр Ян Алексеевич Яковлев, Семён Семёнович Аргунов, Пётр Николаевич Исаев, Николай Васильевич Дьяконов бэйэлэринэн көхтөөхтүк кыттыбыттара өйдөбүнньүк аахсыйатын дириҥ суолталаата.
Эмтиир-реабилитациялыыр киин сэбиэдиссэйэ, РФ уонна СӨ үтүөлээх бырааһа Наталия Дмитриева иһитиннэрбитинэн, 11 олордуллар маһы СӨ норуодунай дьокутаата Сахамин Миланович Афанасьев, 3 маһы бэтэрээннэр Ян Алексеевич Яковлев, Климент Егорович Иванов уонна Виктор Моисеевич Осипов биэрдилэр.
Көхтөөх көҕүлээччилэртэн уонна бырайыак кыттыылаахтарыттан биирдэстэрэ Ян Алексеевич Яковлев манна 100 мас баар буоларыгар баҕарарын туһунан эттэ. Кини санаатынан, ол САССР 100 уонна балыыһа 90 сылларыгар бастыҥ бэлэҕинэн буолуо этэ уонна сэриигэ өлбүт дьоруойдар ааттарын үйэтитиэ этэ.
“Баҕар, сорох маһы эһиил олордуохпут, баҕа санаабытын хайаан да олоххо киллэриэхпит”, — диир кини.
Сыл ичигэс кэмигэр эмтэнээччилэр уонна мэдиссиинискэй үлэһиттэр чыычаах ырыатыттан астыналларын, онтон кырыа кыһын көтөрдөрү аһатар туһугар Ян Алексеевич балыыһаҕа чыычаах уйаларын бэлэхтээбитин тута халлаан күөх өҥүнэн кырааскалыы оҕустулар.
Мэдиссиинискэй наука доктора Ольга Викторовна Татаринова кылаабынай быраастаах Өрөспүүбүлүкэтээҕи 3 №-дээх килиниичэскэй балыыһа сирин-уотун сыл аайы бэйэтин күүһүнэн тупсарарын бэлиэтиир тоҕоостоох. Ол курдук, пандемияны аахсыбакка, искибиэр, клумбалар уонна эмтэнээччилэр сынньаналлларыгар ыскамыайкалар баар буолбуттара, уулуссалар сырдатыллыбыттара.
“Саха сирэ”, edersaas.ru саайтка анаан ЯНА БАЙГОЖАЕВА