Быйыл коронавируһунан сибээстээн, биир кэлим эксээмэни (ЕГЭ) үрдүк үөрэххэ туттарсар эрэ оҕолор туттардылар. Оннооҕор аттестат ыларга ирдэнэр булгуччулаах нуучча тылын, математиканы даҕаны туттарбатылар. Онон орто үөрэххэ киириэхтэрин баҕалаахтар аттестаттарын эксээмэнэ суох ыллылар. Бу инникитин хайдах буолуой?
Үөрэҕи уонна науканы кэтээн көрөр федеральнай сулууспа (Рособрнадзор) инстаграмыгар тустаах тэрилтэ түмүктүүр судаарыстыбаннай аттестацияны тэрийэр уонна ыытар управлениетын начаалынньыга Игорь Круглинскай биир кэлим эксээмэни (ЕГЭ) үрдүк үөрэххэ киирэр эрэ дьон туттардыннар диэн этиини сыаналаата диэн суруйаллар. Кини, маннык быһаарыы ылыллар түгэнигэр, тэрийэр модельга уларытыылары киллэрэр эрэйиллэрин эппит. Ол эрээри, бу бүгүҥҥүтэ быһаарылла илик, төрөппүттэр баҕа санаалара эрэ буолар. Санатан эттэххэ, Рособрнадзор биир кэлим эксээмэни (ЕГЭ) тупсарыыга этиилэри балаҕан ыйын 1 күнүгэр диэри ege2020@obrnadzor.gov.ru аадырыска ылар.
Людмила ПОПОВА, “Саха сирэ” хаһыат, edersaas.ru
+1
+1
+1
+1
+1
+1
+1